بردن بره قلب ايدر· بر بدوى جاهل، بر عارفِ منوّر. أگر ميزان ايسترسه‌ڭ: إسلامدن أوّل عُمَر، إسلامدن صوڭره عُمَر...

بربريله قياسى: بر چكردك، بر شجر... دفعةً ويردى ثمر، او نظرِ أحمدى، او همّتِ پيغمبر

جزيرة العربده، فحم اولمش فطرتلرى قلب ايتدى ألماسلره... بردن بره سراسر...

باروت گبى أخلاقى پارلاتديردى، اولديلر برر نورِ منوّر.

٭ ٭ ٭

يالان، بر لفظِ كافردر

بر دانه صدق، ياقار ميليونله يالانى. بر دانهِٔ حقيقت، ييقار قصرِ خيالى. صدق بيوك أساسدر، بر جوهرِ ضيالى.

يرى ويرر سكوته، أگر چيقسه ضررلى... يالانه ير هيچ يوقدر، چندان اولسه فائده‌لى. هر سوزڭ طوغرى اولسون، هر حكمڭ حق اولمالى.

لٰكن حقّڭ اولاماز، هر طوغرىيى سوز ايتمك. بونى ايى بيلملى.

﴿خُذْ مَا صَفَا دَعْ مَا كَدَرْ﴾

كندينه دستور ايتملى.

گوزل گور، هم گوزل باق. تا گوزل دوشونملى. گوزل بيل، هم گوزل دوشون. تا لذيذ حياتى بولمالى.

حيات ايچنده حياتدر، حسنِ ظنده أملى. سوءِ ظنله يأسدر سعادت مخرّبى، هم ده حياتڭ قاتلى.

٭ ٭ ٭