ايكنجى موقف

﴿بِسْمِ اللّٰهِ الرَّحْمٰنِ الرَّحِيمِ ٭ قُلْ هُوَ اللّٰهُ اَحَدٌ ٭ اَللّٰهُ الصَّمَدُ﴾

شو موقفڭ اوچ مقصدى وار:

برنجى مقصد

(بر ييلديزڭ طوقاديله يره سقوط ايدن أهلِ شرك و ضلالتڭ وكيلى، ذرّه‌لردن ييلديزلره قدر هيچ بر يرده ذرّه مقدار شركه ير بولاماديغندن، او طرزده‌كى دعوادن واز گچوب، فقط شيطان گبى، وحدته دائر تشكيكات ياپمق ايچون اوچ مهمّ سؤال ايله، أحديته و وحدته دائر أهلِ توحيده وسوسه ياپمق ايستدى.)

برنجى سؤال:

زندقه لسانيله دييور كه: "أى أهلِ توحيد! بن، كندى مؤكّللرم نامنه بر شى بولامادم، موجوداتده بر حصّه چيقاره‌مدم، مسلگمى إثبات ايده‌مه‌دم. فقط سز نه ايله، نهايتسز بر قدرت صاحبى بر واحدِ أحدى إثبات ايدييورسڭز؟ نه‌دن اونڭ قدرتيله برابر باشقه أللر قاريشماسنى قابل گورمييورسڭز؟"

الجواب:

يگرمى ايكنجى سوزده قطعى إثبات ايديلمش كه· بتون موجودات، بتون ذرّات، بتون ييلديزلر، هر برى واجب الوجودڭ و قديرِ مطلقڭ وجوبِ وجودينه برر برهانِ نيّردر. بتون كائناتده‌كى سلسله‌لرڭ هر برى، اونڭ وحدانيتنه برر دليلِ قطعيدر. قرآنِ حكيم حدسز برهانلرنده إثبات ايتديگى گبى، عمومڭ نظرينه أڭ ظاهر برهانلرى داها زياده ذكر ايدر. أزجمله:

﴿وَ لَئِنْ سَأَلْتَهُمْ مَنْ خَلَقَ السَّمٰوَاتِ وَ الْاَرْضَ لَيَقُولُنَّ اللّٰهُ ٭ وَ مِنْ اٰيَاتِهِ خَلْقُ السَّمٰوَاتِ وَ الْاَرْضِ وَ اخْتِلَافُ اَلْسِنَتِكُمْ وَ اَلْوَانِكُمْ﴾

گبى پك چوق آياتله، قرآنِ حكيم· خلقتِ أرض و سماواتى، وحدانيته بداهت درجه‌سنده بر برهان گوسترييور كه، ايستر ايسته‌مز ذىشعور اولان هر آدم، خلقتِ أرض و سماواتده بِالضروره خالقِ ذو الجلالنى تصديق ايتمگه مجبوردر كه،

﴿لَيَقُولُنَّ اللّٰهُ﴾

دير.