مهمّ بر سؤال:

دييورسڭز كه: "محبّت، إختيارى دگل. هم إحتياجِ فطرىيه بناءً، لذيذ طعاملرى و ميوه‌لرى سَوه‌رم. پدر و والده و أولادلريمى سَوه‌رم. رفيقهِٔ حياتمى سَوه‌رم. دوست و أحبابلريمى سَوه‌رم. أنبيا و أوليايى سَوه‌رم. حياتمى، گنجلگمى سَوه‌رم. بهارى و گوزل شيلرى و دنيايى سَوه‌رم. ناصل بونلرى سوميه‌جگم؟ ناصل بتون بو محبّتلرى، جنابِ حقّڭ ذات و صفات و أسماسنه ويره‌بيليرم؟ بو نه ديمكدر؟

الجواب:

"درت نكته"يى ديڭله.

برنجى نكته:

محبّت، چندان إختيارى دگل. فقط إختيار ايله، محبّتڭ يوزى، بر محبوبدن ديگر بر محبوبه دونه‌بيلير. مثلا: بر محبوبڭ چركينلگنى گوسترمكله وياخود أصل لايقِ محبّت اولان ديگر بر محبوبه پرده ويا آيينه اولديغنى گوسترمكله، محبّتڭ يوزى، مجازى محبوبدن حقيقى محبوبه چوريله‌بيلير.

ايكنجى نكته:

تعداد ايتديگڭ سَوْدكلريڭى، سومه ديمييورز. بلكه اونلرى جنابِ حقّڭ حسابنه و اونڭ محبّتى نامنه سه‌و، ديرز. مثلا: لذيذ طعاملرى، گوزل ميوه‌لرى، جنابِ حقّڭ إحسانى و او رحمٰنِ رحيمڭ إنعامى جهتنده سومك، "رحمٰن" و "منعم" إسملرينى سومكدر، هم معنوى بر شكردر. شو محبّت، يالڭز نفس حسابنه اولماديغنى و رحمٰن نامنه اولديغنى گوسترن· مشروع دائره‌سنده قناعتكارانه قزانمق و متفكّرانه، متشكّرانه يمكدر.