اون بشنجى سوز

﴿بِسْمِ اللّٰهِ الرَّحْمٰنِ الرَّحِيمِ﴾

﴿وَ لَقَدْ زَيَّنَّا السَّمَاءَ الدُّنْيَا بِمَصَابِيحَ وَ جَعَلْنَاهَا رُجُومًا لِلشَّيَاطِينِ﴾

أى قوزموغرافيانڭ روحسز مسئله‌لريله ذهنى طارلاشان و عقلى گوزينه اينن و شو آيتڭ عظمتلى سرّينى، او صيقيشمش ذهننده يرلشديره‌مه‌ين مكتبلى أفندى! شو آيتڭ سماسنه يدى باصامقلى بر مرديوانله چيقيله‌بيلير. گل، برابر چيقه‌جغز!

برنجى باصامق:

حقيقت و حكمت ايستر كه: زمين گبى، سماواتڭ ده كندينه مناسب سكنه‌لرى بولونسون. لسانِ شرعيده او أجناسِ مختلفه‌يه، ملائكه و روحانيات تسميه ايديلير. أوت، حقيقت اويله إقتضا ايدر. زيرا زمين كوچكلگى و حقارتيله برابر، ذىحيات و ذىشعور مخلوقلردن طولديرلمسى و آرا صيره بوشالتيلوب يڭيدن ذىشعورلرله شنلنديرلمسى إشارت ايدر، بلكه تصريح ايدر كه: شو محتشم برجلر صاحبى، مزيَّن قصرلر حكمنده اولان سماوات دخى، ذىشعور و ذوى الإدراك مخلوقلرله طولودر. اونلر دخى إنس و جنّ گبى، شو عالم سراينڭ سيرجيلرى و شو كائنات كتابنڭ مطالعه‌جيلرى و شو سلطنتِ ربوبيتڭ دلاّللريدرلر. چونكه كائناتى حدّ و حسابه گلمه‌ين تزيينات و محاسن و نقوش ايله سوسلنديروب تزيين ايتمه‌سى· بِالبداهه متفكّر إستحسان ايديجى و متحيّر تقدير ايديجيلرڭ أنظارينى ايستر. أوت، حُسن ألبته بر عاشق ايستر· طعام ايسه، آج اولانه ويريلير. حالبوكه إنس و جنّ، شو نهايتسز وظيفه‌يه، شو حشمتلى نظارته و شو وسعتلى عبوديته قارشى ميليوندن بريسنى آنجق ياپابيلير. ديمك بو نهايتسز و متنوّع وظائفه و عباداته، نهايتسز ملائكه أنواعى و روحانيات أجناسى لازمدر.