ايشته، جنّت بر چيچكدر. حورى طائفه‌سى دخى بر چيچكدر. روىِ زمين دخى بر چيچكدر. بهار ده بر چيچكدر. سما ده بر چيچكدر· ييلديزلر، او چيچگڭ يالديزلى نقشلريدر. گونش ده بر چيچكدر· ضياسنده‌كى يدى رنگى، او چيچگڭ نقشلى بويالريدر. عالم، گوزل و بيوك بر إنساندر· ناصلكه إنسان، كوچك بر عالمدر. حوريلر نوعى و روحانيلر جماعتى و مَلك جنسى و جنّ طائفه‌سى و إنسان نوعى، برر گوزل شخص حكمنده تصوير و تنظيم و ايجاد ايديلمشدر. هم هر برى كلّيتى ايله· هم هر بر فردى، تك باشيله صانعِ ذو الجمالنڭ أسماسنى گوستردكلرى گبى· اونڭ جمالنه، كمالنه، رحمتنه و محبّتنه برر آيرى آيرى آيينه‌لردر. و نهايتسز جمال و كمالنه و رحمت و محبّتنه برر شاهدِ صادقدر. و او جمال و كمالڭ و رحمت و محبّتڭ برر آياتيدر، برر أماراتيدر. ايشته شو نهايتسز أنواعِ كمالات، دائرهِٔ واحديتده و أحديتده حاصلدر. ديمك او دائره خارجنده توهّم اولونان كمالات، كمالات دگلدر.

ايشته حقائقِ أشيانڭ أسماءِ إلٰهيه‌يه طايانديغنى و إستناد ايتديگنى، بلكه حقيقى حقائق، او أسمانڭ جلوه‌لرى اولديغنى و هر شيئڭ چوق جهتلرله، چوق ديللرله صانعنى ذكر و تسبيح ايتديگنى آڭلا.

﴿وَ اِنْ مِنْ شَيْءٍ اِلَّا يُسَبِّحُ بِحَمْدِهِ﴾

نڭ بر معناسنى بيل و

﴿سُبْحَانَ مَنِ اخْتَفٰى بِشِدَّةِ ظُهُورِهِ﴾

دى. و آيتلرڭ آخرلرنده اولان

﴿وَ هُوَ الْعَزِيزُ الْحَكِيمُ ٭ وَ هُوَ الْغَفُورُ الرَّحِيمُ ٭ وَ هُوَ الْعَلِيمُ الْقَدِيرُ﴾

گبى ذكر و تكرارلرنده‌كى بر سرّى فهم ايت.

أگر بر چيچكده أسمايى اوقويامييورسه‌ڭ و واضح گوره‌ميورسه‌ڭ· جنّته باق، بهاره دقّت ايت، زمينڭ يوزينى تماشا ايت. رحمتڭ شو بيوك چيچكلرى اولان جنّت و بهار و زمينده يازيلان أسمايى واضحًا اوقويه‌بيليرسڭ، جلوه‌لرينى و نقشلرينى آڭلار، گورورسڭ.