مثلا: ناصلكه سخاوتلى، عالىجناب، مشفق بر ذات، گوزل بر ضيافتى، غايت فقير و آج و محتاج اولانلره ويرمك ايچون، سياحت ايدن گوزل بر گميسنه سره‌ر. كندى ده اوستنده سير ايدر. او فقارانڭ منّتدارانه تنعّملرى و او آج اولانلرڭ متشكّرانه تلذّذلرى و او محتاج اولانلرڭ ثناكارانه ممنونيتلرى· نه درجه او كريم ذاتى مسرور و مفرّح ايدر، نه قدر اونڭ خوشنه گيدر، آڭلارسڭ.

ايشته كوچوجك بر سفره‌نڭ حقيقى مالكى اولميان و بر توزيعات مأمورى حكمنده اولان بر إنسانڭ مسروريتى بويله ايسه· جنّ و إنسى و حيواناتى، فضاىِ عالم دڭزنده سير و سياحت ايتديرن و بر سفينهِٔ ربّانيه اولان قوجه زمينڭ اوستنه بينديروب، يوزنده حدسز أنواعِ مطعوماتى جامع بر سفره‌يى سروب، بتون ذىحياتى كوچك بر قهوه‌آلتى نوعنده او ضيافته دعوت ايتمكله برابر، غايت مكمّل و بتون أنواعِ لذائذى جامع، سرمدى، أبدى بر دارِ بقاده جنّتلرى، هر بريسنى برر سفرهِٔ نعمت ايده‌رك حدسز لذائذى و لطائفى جامع بر طرزده، نهايتسز بر زمانده، نهايتسز محتاج، نهايتسز مشتاق، نهايتسز عبادينه، حقيقى يمك ايچون ضيافت آچان بر رحمٰن الرحيمه عائد و تعبيرنده عاجز اولديغمز معانئِ مقدّسهِٔ محبّتى و نتائجِ رحمتى قياس ايده‌بيليرسڭ.

هم مثلا: ماهر بر صنعتپرور مهارتنى گوسترمگى سَور بر اوسته· گوزل، پلاقسز قونوشان فونوغراف گبى بر صنعتى ايجاد ايتدكدن صوڭره، اونى قوروب تجربه ايدييور، گوسترييور. او صنعتكارڭ دوشونديگى و ايستديگى نتيجه‌لرى أڭ مكمّل بر طرزده گوسترسه· اونڭ موجدى نه قدر إفتخار ايدر، نه قدر ممنون اولور، نه درجه خوشنه گيدر. كندى كندينه "بارك اللّٰه" دير.

ايشته كوچوجك بر إنسان، ايجادسز، صِرف صورى بر صنعتجغى ايله، بر فونوغرافڭ گوزل ايشله‌مسيله بويله ممنون اولسه· عجبا بر صانعِ ذو الجلال، قوجه كائناتى، بر موسيقى، بر فونوغراف حكمنده ايجاد ايتديگى گبى، زمينى و زمين ايچنده‌كى بتون ذىحياتى و بِالخاصّه ذىحيات ايچنده إنسانڭ باشنى اويله بر فونوغرافِ ربّانى و بر موسيقهِٔ إلٰهى طرزنده ياپمش كه· حكمتِ بشر، او صنعت قارشيسنده حيرتندن پارمغنى ايصيرييور.