شو رساله‌نڭ باشندن شيمدىيه قدر تحقيق نامنه بىطرفانه محاكمه صورتنده، قرآنڭ إعجازينى معنّد بر خصمه قبول ايتديرمك ايچون قرآنڭ چوق حقوقنى گيزلى بيراقدق. او گونشى، موملر صيره‌سنه گتيروب موازنه ايدييوردق. شيمدى تحقيق وظيفه‌سنى ايفا ايدوب، پارلاق بر صورتده إعجازينى إثبات ايتدى. شيمدى ايسه تحقيق نامنه دگل، حقيقت نامنه بر ايكى سوز ايله قرآنڭ موازنه‌يه گلمز حقيقى مقامنه إشارت ايده‌جگز:

أوت سائر كلاملرڭ قرآنڭ آياتنه نسبتى، شيشه‌لرده‌كى گورونن ييلديزلرڭ كوچوجك عكسلريله ييلديزلرڭ عيننه نسبتى گبيدر. أوت هر برى برر حقيقتِ ثابته‌يى تصوير ايدن، گوسترن قرآنڭ كلماتى نره‌ده؟ بشرڭ فكرى و طويغولرينڭ آيينه‌جكلرنده كلماتيله ترسيم ايتدكلرى معنالر نره‌ده؟ أوت أنوارِ هدايتى إلهام ايدن و شمس و قمرڭ خالقِ ذو الجلالنڭ كلامى اولان قرآنڭ ملائكه‌مثال ذىحيات كلماتى نره‌ده؟ بشرڭ هوساتنى اويانديرمق ايچون سحّار نفسلريله، مُزَوَّر اينجه‌لكلريله ايصيريجى كلماتى نره‌ده؟ أوت ايصيريجى حشرات و بوجكلرڭ، مبارك ملائكه و نورانى روحانيلره نسبتى نه ايسه· بشرڭ كلماتى، قرآنڭ كلماتنه نسبتى اودر. شو حقيقتلرى يگرمى بشنجى سوز ايله برابر گچن يگرمى درت عدد سوزلر إثبات ايتمشدر. شو دعوامز مجرّد دگل· برهانى گچمش نتيجه‌در.

أوت هر برى جواهرِ هدايتڭ برر صدفى و حقائقِ ايمانيه‌نڭ برر منبعى و أساساتِ إسلاميه‌نڭ برر معدنى و طوغريدن طوغرىيه عرش الرحماندن گلن و كائناتڭ فوقنده و خارجنده إنسانه باقوب اينن و علم و قدرت و إراده‌يى تضمّن ايدن و خطابِ أزلى اولان ألفاظِ قرآنيه نره‌ده؟ إنسانڭ هوائى، هواپرستانه، واهى، هوسپرورانه ألفاظى نره‌ده؟ أوت قرآن بر شجرهِٔ طوبٰى حكمنه گچوب شو عالمِ إسلاميه‌يى بتون معنوياتيله، شعائر و كمالاتيله، دساتير و أحكاميله ياپراقلر صورتنده نشر ايدوب أصفيا و أولياسنى برر چيچك حكمنده او آغاجڭ آبِ حياتيله تازه، گوزل گوستروب بتون كمالات و حقائقِ كونيه و إلٰهيه‌يى ثمره ويروب ميوه‌لرنده‌كى چوق چكردكلرى عملى برر دستور، برر پروغرام حكمنه گچوب ينه ميوه‌دار آغاج حكمنده متسلسل حقائقى گوسترن قرآن نره‌ده؟ بشرڭ معلوممز اولان كلامى نره‌ده؟

﴿اَيْنَ الثَّرَا مِنَ الثُّرَيَّا﴾