برنجى آيتده آثارى بسط ايدوب بر نتيجه‌نڭ، بر مهمّ مقصودڭ مقدّماتى گبى· علم و قدرته، غايات و نظاماتيله شهادت ايدن أڭ عظيم أثرلرى سرد ايدر. عليم إسمنى إستخراج ايدر. ايكنجى آيتده، برنجى شعله‌نڭ برنجى شعاعنڭ اوچنجى نقطه‌سنده بر درجه ايضاح اولونديغى گبى· جنابِ حقّڭ بيوك أفعالنى، عظيم آثارينى ذكر ايده‌رك نتيجه‌سنده يومِ فصل اولان حشرى، نتيجه اولارق ذكر ايدييور.

ايكنجى نكتهِٔ بلاغت:

قرآن، بشرڭ نظرينه صنعتِ إلٰهيه‌نڭ منسوجاتنى آچار، گوسترر. صوڭره فذلكه‌ده او منسوجاتى، أسماء ايچنده طىّ ايدر وياخود عقله حواله ايدر. برنجينڭ مثاللرندن مثلا:

﴿قُلْ مَنْ يَرْزُقُكُمْ مِنَ السَّمَاءِ وَ الْاَرْضِ اَمَّنْ يَمْلِكُ السَّمْعَ وَ الْاَبْصَارَ وَ مَنْ يُخْرِجُ الْحَىَّ مِنَ الْمَيِّتِ وَ يُخْرِجُ الْمَيِّتَ مِنَ الْحَىِّ وَ مَنْ يُدَبِّرُ الْاَمْرَ فَسَيَقُولُونَ اللّٰهُ فَقُلْ اَفَلَا تَتَّقُونَ فَذٰلِكُمُ اللّٰهُ رَبُّكُمُ الْحَقُّ﴾

ايشته باشده دير: "سما و زمينى، رزقڭزه ايكى خزينه گبى مهيّا ايدوب اورادن ياغمورى، بورادن حبوباتى چيقاران كيمدر؟ اللّٰهدن باشقه قوجه سما و زمينى ايكى مطيع خزينه‌دار حكمنه كيمسه گتيره‌بيلير مى؟ اويله ايسه، شكر اوڭا منحصردر."

ايكنجى فقره‌ده دير كه: "سزڭ أعضالريڭز ايچنده أڭ قيمتدار گوز و قولاقلريڭزڭ مالكى كيمدر؟ هانگى تزگاه و دكّاندن آلديڭز؟ بو لطيف قيمتدار گوز و قولاغى ويره‌جك آنجق ربّڭزدر. سزى ايجاد ايدوب تربيه ايدن اودر كه، بونلرى سزه ويرمشدر. اويله ايسه يالڭز ربّ اودر، معبود ده او اولابيلير."

اوچنجى فقره‌ده دير: "ئولمش يرى إحيا ايدوب يوز بيڭلر ئولمش طائفه‌لرى إحيا ايدن كيمدر؟ حقدن باشقه و بتون كائناتڭ خالقندن باشقه شو ايشى كيم ياپابيلير؟ ألبته او ياپار. او إحيا ايدر. مادام حقدر، حقوقى ضايع ايتميه‌جكدر. سزى بر محكمهِٔ كبرايه گوندره‌جكدر. يرى إحيا ايتديگى گبى، سزى ده إحيا ايده‌جكدر."