رابعًا:

هم قرآنى كلامِ بشر فرض ايتمك لازم گلير كه· نوعِ بنى آدمڭ أڭ بيوك و محتشم اوردوسى اولان اُمّتِ محمّديه‌نڭ (عصم) مقدّس قوماندانى اولان قرآن، بِالمشاهده قوّتلى قانونلريله، أساسلى دستورلريله، نافذ أمرلريله او پك بيوك اوردويى، ايكى جهانى فتح ايده‌جك بر درجه‌ده بر إنتظام ويرديگى و بر إنضباط آلتنه آلديغى و مادّى معنوى تجهيز ايتديگى و عموم او أفرادڭ درجاتنه گوره عقللرينى تعليم و قلبلرينى تربيه و روحلرينى تسخير و وجدانلرينى تطهير و أعضا و جوارحلرينى إستعمال و إستخدام ايتديگى حالده· (حاشا، يوز بيڭ دفعه حاشا) قوّتسز، قيمتسز، أصلسز بر دوزمه فرض ايدوب يوز درجه محالى قبول ايتمك لازم گلمكله برابر.. مدّتِ حياتنده جدّى حركاتيله حقّڭ قانونلرينى بنى آدمه درس ويرن و صميمى أفعاليله حقيقتڭ دستورلرينى بشره تعليم ايدن و خالص و معقول أقواليله إستقامتڭ و سعادتڭ اصوللرينى گوسترن و تأسيس ايدن و بتون تاريخچهِٔ حياتنڭ شهادتيله اللّٰهڭ عذابندن چوق خوف ايدن و هركسدن زياده اللّٰهى بيلن و بيلديرن و نوعِ بشرڭ بشدن بريسنه و كُرهِٔ أرضڭ ياريسنه بيڭ اوچ يوز أللى سنه كمالِ حشمت ايله قوماندانلق ايدن و جهانى ولوَله‌يه ويرن و شهرتشعار شئوناتيله نوعِ بشرڭ بلكه كائناتڭ الحقّ مدارِ فخرى اولان بر ذاتى· (حاشا، يوز بيڭ دفعه حاشا) ساخته‌كار، اللّٰهدن قورقماز و بيلمز و حيثيتنى طانيماز، إنسانيتڭ عادى درجه‌سنده فرض ايتمكله يوز درجه محالى بردن إرتكاب ايتمك لازم گلير. چونكه شو مسئله‌نڭ اورته‌سى يوقدر. زيرا فرضِ محال اولارق قرآن كلام اللّٰه اولمازسه· عرشدن دوشسه، اورته‌ده قالاماز. بلكه يرده يالانجى برينڭ مالى اولديغنى قبول ايتمك لازم گلير. بو ايسه أى شيطان! يوز درجه سن قتمرلى بر شيطان اولسه‌ڭ، بوزولمه‌مش هيچ بر عقلى قانديره‌مازسڭ و چورومه‌مش هيچ بر قلبى إقناع ايده‌مزسڭ.

شيطان دوندى، ديدى:

ناصل قانديره‌مام؟ أكثر إنسانلره و إنسانڭ مشهور عاقللرينه قرآنى و محمّدى إنكار ايتديردم.