بشنجى باصامق:

مادام أرضدن سمايه گيدوب گلمك وار. سمادن أرضه اينوب چيقمق اولويور. أهمّيتلى لوازماتِ أرضيه، اورادن گوندريلييور. و مادام أرواحِ طيّبه‌لر سمايه گيدييورلر. ألبته أرواحِ خبيثه دخى، أخيارى تقليدًا سماوات مملكتنه گيتمگه تشبّث ايده‌جكلر. چونكه وجودجه لطافت و خفّتلرى وار. هم شبهه‌سز طرد و ردّ ايديله‌جكلر. چونكه ماهيتجه شرارت و نحوستلرى واردر. هم بِلا شك ولا شبهه، شو معاملهِٔ مهمّه‌نڭ و شو مبارزهِٔ معنويه‌نڭ عالمِ شهادتده بر علامتى، بر إشارتى بولونه‌جقدر. چونكه سلطنتِ ربوبيتڭ حكمتى إقتضا ايدر كه: ذىشعور ايچون، باخصوص أڭ مهمّ وظيفه‌سى مشاهده و شهادت و دلاّللق و نظارت اولان إنسان ايچون تصرّفاتِ غيبيه‌نڭ مهملرينه بر إشارت قويسون، برر علامت بيراقسين. ناصلكه نهايتسز بهار معجزاتنه ياغمورى إشارت قويمش و خوارقِ صنعتنه أسبابِ ظاهريه‌يى علامت ايتمش. تا، عالمِ شهادت أهلنى إشهاد ايتسين. بلكه او عجيب تماشايه، عموم أهلِ سماوات و سكنهِٔ أرضڭ أنظارِ دقّتلرينى جلب ايتسين. يعنى او قوجه سماواتى، أطرافنده نوبتدارلر ديزيلمش، برجلرى تزيين ايديلمش بر قلعه حكمنده، بر شهر صورتنده گوستروب حشمتِ ربوبيتنى تفكّر ايتديرسين. مادام شو مبارزهِٔ علويه‌نڭ إعلانى، حكمةً لازمدر. ألبته اوڭا بر إشارت واردر. حالبوكه حادثاتِ جوّيه و سماويه ايچنده شو إعلانه مناسب هيچ بر حادثه گورونميور. بوندن داها أنسبى يوقدر. زيرا يوكسك قلعه‌لرڭ محكم برجلرندن آتيلان منجنيقلر و إشارت فشنكلرينه بڭزه‌ين شو حادثاتِ نجميه، بو رجمِ شيطانه نه قدر أنسب دوشديگى بداهةً آڭلاشيلير. حالبوكه شو حادثه‌نڭ، بو حكمتدن و شو غايه‌دن باشقه اوڭا مناسب بر حكمتى بيلينمييور. سائر حادثات اويله دگل. هم شو حكمت، زمانِ آدمدن بَرى مشهوردر و أهلِ حقيقت ايچون مشهوددر.