﴿بِاسْمِهِ سُبْحَانَهُ ٭ اَلسَّلَامُ عَلَيْكُمْ وَ رَحْمَةُ اللّٰهِ وَ بَرَكَاتُهُ﴾

عزيز صدّيق قارداشلرم،

حپس مصيبتنه دوشنلره و اونلره مرحمتكارانه، صداقتله، خارجدن گلن أرزاقلرينه نظارت و يارديم ايدنلره قوّتلى بر تسلّىيى "اوچ نقطه"ده بيان ايده‌جگم.

برنجى نقطه:

حپسده گچن عمر گونلرى، هر بر گون اون گون قدر بر عبادت قزانديرابيلير و فانى ساعتلرى، ميوه‌لرى جهتيله معنًا باقى ساعتلره چويره‌بيلير و بش اون سنه جزا ايله، ميليونلر سنه حپسِ أبديدن قورتولمغه وسيله اولابيلير. ايشته أهلِ ايمان ايچون بو پك بيوك و چوق قيمتدار قزانج شرطى، فرض نمازينى قيلمق و حپسه سببيت ويرن گناهلردن توبه ايتمك و صبر ايچنده شكر ايتمكدر. ذاتًا حپس چوق گناهلره مانعدر، ميدان ويرمييور.

ايكنجى نقطه:

زوالِ لذّت ألم اولديغى گبى، زوالِ ألم دخى لذّتدر. أوت هركس گچمش لذّتلى، صفالى گونلرينى دوشونسه· تأسّف و تحسّر ألمِ معنويسنى حسّ ايدوب "أيواه" دير و گچمش مصيبتلى، ألملى گونلرينى تخطّر ايتسه· زوالندن بر معنوى لذّت حسّ ايدر كه: "الحمد ِللّٰه شكر، او بلا ثوابنى بيراقدى گيتدى" دير. فرح ايله تنفّس ايدر. ديمك بر ساعت موقّت ألم، روحده بر معنوى لذّت بيراقير و لذّتلى ساعت، بِالعكس ألم بيراقير. مادام حقيقت بودر و مادام گچمش مصيبت ساعتلرى، ألملرى ايله برابر معدوم و يوق اولمش و گله‌جك بلا گونلرى، شيمدى معدوم و يوقدر و يوقدن ألم يوق و معدومدن ألم گلمز. مثلا، بر قاچ گون صوڭره آج و صوسز اولمق إحتمالندن، بوگون او نيّتله متماديًا أكمك يه‌سه و صو ايچسه، نه درجه ديوانه‌لكدر. عينًا اويله ده، گچمش و گله‌جك ألملى ساعتلرى (كه هيچ و معدوم و يوق اولمشلر) شيمدى دوشونوب صبرسزلق گوسترمك و قصورلى نفسنى بيراقوب، اللّٰهدن شكوا ايتمك گبى "اوف، اوف" ايتمك ديوانه‌لكدر. أگر صاغه صوله يعنى گچمش و گله‌جكلره صبر قوّتنى طاغيتمازسه و حاضر ساعته و گونه قارشى طوتسه، تام كافى گلير. صيقنتى اوندن بره اينر. حتّى شكوا اولماسين، بن بو اوچنجى مدرسهِٔ يوسفيه‌ده، بر قاچ گون ظرفنده، هيچ عمرمده گورمه‌ديگم مادّى و معنوى صيقنتيلى، خسته‌لقلى مصيبتمده، خصوصًا نورڭ خدمتندن محروميتمدن گلن مأيوسيت و قلبى و روحى صيقنتيلر بنى أزديگى صيراده، عنايتِ إلٰهيه بو مذكور حقيقتى گوستردى. بن ده صيقنتيلى خسته‌لغمدن و حپسمدن راضى اولدم. چونكه بنم گبى قبر قپوسنده بر بيچاره‌يه، غفلتله گچه‌بيلير بر ساعتنى، اون عدد عبادت ساعتلرى ياپمق بيوك كاردر دييه شكر أيله‌دم.