محكمه‌لرڭ إحقاقِ حق جهتنده‌كى حيثيتنه، شرفنه مهمّ بر نقيصه بلكه ضد اولان غرضكارلرڭ تلقيناتنه تبعيته، ألبته بو يوكسك محكمهِٔ عدالت تنزّل ايتميه‌جك و غرضكارلرڭ أنتريقه‌لرينى عقيم بيراقه‌جقدر. و عدالتدن و إحقاقِ حقدن داها بيوك بر مقام وظيفه جهتنده طانيميان محكمه‌نڭ، هر درلو تأثيراتدن آزاده اولارق وظيفه‌سنى ياپاجغى، أساس عدالتڭ مقتضاسى اولديغنه إستنادًا· شخصم نامنه دگل، بلكه پك چوق حقيقتلرڭ و بر چوق معصوم حقوقلرڭ كندينه باغلى اولديغى بر حقيقتِ عاليه نامنه، حقّمزده‌كى أصلسز أوهاملرينى بر آن أوّل رسالهِٔ نورڭ حرّيتنى إعلان ايتمكله رفع ايتمكدر.

اوچنجى مادّه:

بزه إسناد ايديلن موهوم صوچ ايسه· عمومى بر تعبير ايله و قيودِ إحترازيه نظره آلينميه‌رق، قانونڭ يوز آلتمش اوچنجى مادّه‌سنى، يالڭز ظواهرينه و عموميتنه تماس ايتديروب، محكوميتم إلتزام ايديلمك ايسته‌نيلديگى آڭلاشيلييور. بزه إسناد ايديلن بر قاچ مادّه‌نڭ قطعى و حقيقى جوابلرى، ضبطڭزه گچن مدافعاتمده بولونمقله برابر· اون ويا اونبش نقطه يوزندن، معنوى يوز كشفياتى حاوى، يوزلر حقيقتِ مهمّه‌يى جامع اولان يوزدن زياده جزءدن عبارت اولان رسالهِٔ نور، مكافات و تقدير يرينه مجازات و تنقيد ايله قارشيلانمشدر. يوكسك محكمه‌ڭزدن بو حقّمى و رسالهِٔ نورڭ حرّيت حقّنى ايسته‌مك، بيوك بر حقّمدر. بو جهتڭ حلّى و فصلى لا بُد و ضروريدر.