اون دردنجى لمعه

(ايكى مقامدر. برنجى مقامى ايكى سؤالڭ جوابيدر.)

﴿بِاسْمِهِ سُبْحَانَهُ ٭ وَاِنْ مِنْ شَيْءٍ اِلَّا يُسَبِّحُ بِحَمْدِهِ﴾

﴿اَلسَّلَامُ عَلَيْكُمْ وَ رَحْمَةُ اللّٰهِ وَ بَرَكَاتُهُ﴾

عزيز صدّيق قارداشم رأفت بك!

ثَوْر و حوته دائر صورديغڭ سؤالڭ بعض رساله‌لرده جوابى واردر. او نوع سؤاللره گوره جواب يگرمى دردنجى سوزڭ اوچنجى دالنده اون ايكى أصل ناميله اون ايكى قاعدهِٔ مهمّه بيان ايديلمشدر. او قاعده‌لر أحاديثِ نبويه‌يه دائر مختلف تأويلاته دائر برر محكدرلر و أحاديثه گلن أوهامى دفع ايده‌جك مهمّ أساسلردر.

مع التأسّف شيمديلك سنوحاتدن باشقه علمى مسائل ايله إشتغالمه مانع بعض حاللر وار. اونڭ ايچون سؤالڭزه گوره جواب ويره‌مييورم. أگر سنوحاتِ قلبيه اولسه، بِالمجبوريه مشغول اولويورم. بعضًا سؤاللره، سنوحات توافق ايتديگى ايچون جواب ويريلير، گوجنمه‌يڭز. اونڭ ايچون هر بر سؤالڭزه لايقنجه جواب ويره‌مييورم. هايدى بو دفعه‌كى سؤالڭزه قيصه بر جواب ويره‌يم.