يگرمى آلتنجى لمعه

إختيارلر لمعه‌سى

(يگرمى آلتى رجا و ضياءِ تسلّىيى جامعدر.)

إخطار:

هر بر "رجا"نڭ باشنده معنوى درديمى غايت أليم و سزى متأثّر ايده‌جك درجه‌ده يازديغمڭ سببى: قرآنِ حكيمدن گلن علاجڭ فوق العاده تأثيرينى گوسترمك ايچوندر. إختيارلره عائد بو لمعه، اوچ درت جهتله حسنِ إفاده‌يى محافظه ايده‌مه‌مش.

برنجيسى:

سرگذشتِ حياتمه عائد اولديغى ايچون، او زمانلره خيالاً گيدوب او حالتده يازيلديغندن· إفاده، إنتظامنى محافظه ايده‌مدى.

ايكنجيسى:

صباح نمازندن صوڭره غايت يورغونلق حسّ ايتديگم بر زمانده، هم سرعته مجبوريت تحتنده يازيلديغندن إفاده‌ده مشوّشيت دوشمش.

اوچنجيسى:

يانمده دائم يازاجق بولونماديغندن، يانمده بولونان كاتبڭ ده رسالهِٔ نوره عائد درت بش وظيفه‌سى اولمقله، تصحيحاتنه تام وقت بولامديغمزدن إنتظامسز قالدى.

دردنجيسى:

تأليفڭ عقبنده ايكيمز ده يورغون اولارق، معنايى دقّتله دوشونه‌ميه‌رك، غايت سطحى بر تصحيحله إكتفا ايديلديگندن، طرزِ إفاده‌ده ألبته قصورلر بولونه‌جق. عالىجناب إختيارلردن، إفاده‌ده‌كى قصورلريمه نظرِ مسامحه ايله باقمق· و رحمتِ إلٰهيه بوش اولارق دونديرمديگى مبارك إختيارلر، أللرينى درگاهِ إلٰهيه‌يه آچدقلرى وقت بزى ده دعالرنده داخل ايتسينلر.