أوت حكومتِ جمهوريه، او گيزلى مفسدلرڭ وطنه و ملّته مضر أفكارلرينى ألبته ترويج ايتمز و طرفدار اولاماز. و بيلسه منع ايتمك، جمهوريت قانونلرينڭ مقتضاسيدر. و اويله مفسدلره حكومت حسابنه طرفدارلقله، جمهوريتڭ أساسلى پرنسبلرينه ضدّى ضدّينه گيده‌مز. حكومتِ جمهوريه، بزم ايله او مفسدلرڭ مابيْننده حَكم· هانگيمز ظالم ايسه، تجاوز ايدييورسه او وقت او حَكم حكمنى ويرسين و حاكملك نقطه‌سنده حكمنى إجرا ايتسين.

أوت إنكار ايديلمز كه· كائناتده دينسزلك ايله ديندارلق، آدم زمانندن بَرى جريان ايدوب گلييور و قيامته قدر گيده‌جكدر. بو مسئله‌مزڭ كنهنه واقف اولان هركس، بزه اولان بو هجومڭ، طوغريدن طوغرىيه دينسزلك حسابنه ديندارلغه بر تعرّض اولديغنى آڭلار. أكثرِ حكمانڭ غربده و آوروپاده ظهورى و أغلبِ أنبيانڭ شرقده و آسياده طلوعلرى، قدرِ أزلينڭ بر إشارت و رمزيدر كه· آسياده حاكم، غالب، دين جريانيدر. ألبته آسيانڭ ايلرى قوماندانى اولان بو حكومتِ جمهوريه، آسيانڭ بو فطرى خاصيتندن و معدنندن إستفاده ايده‌جك و بىطرفانه پرنسبنى، دگل دينسزلك طرفنه، بلكه ديندارلق طرفنه تمايل ايتديره‌جكدر.

ايكنجى مادّه:

رسالهِٔ نورڭ أجزالرنده موادِّ قانونيه‌يه معارض مسئله‌لر بولونماسى اورته‌يه قونولابيلير. بو جهت محكمه‌يه عائددر. فقط رسالهِٔ نور، كندى باشيله يوز معنوى كشفياتِ مهمّه‌يى حاوى بر أثردر. بو كشفياتڭ بر تكنى بيله، كشّافڭ حقِّ كشفنى صيانت ايتمكله، ضياعه اوغراتمامق لازم گلير. كشفياتڭ أهمّيتى، أهلِ حقيقت و أهلِ علم و أديبلر اورته‌سنده غايت بيوكدر و أهمّيتى وار. بر كيمسه، ديگرينڭ كشفياتنى تملّك ايده‌مز. أگر ايتسه اونڭ عليهنده إقامهِٔ دعوا ايتمك، بتون مملكتلرده جارى اولان بر قانوندر. ايلريده حكومتڭ مساعده‌سنى إستحصال ايتمك صورتيله نشر ايتمك ايستديگم و يگرمى اوتوز سنه‌دن بَرى كشف و تأليفنه چاليشديغم و أللى سنه‌دن بَرى دوام ايدن تدقيقات و مجاهداتِ فكريه و مختلف منبعلرده‌كى تحرّياتِ مساعيمڭ نتيجه‌سى و ثمره‌سى اولارق يازديغم و معنوى يوز كشفياتى گوسترن و بيڭلر حقيقتى حاوى يوزدن زياده رساله‌دن عبارت اولان رسالهِٔ نورڭ تأليفندن صوڭره نشر ايديلن بعض قانونلره اويغون گلمه‌ين اون اونبش نقطه‌سنى اورته‌يه آتارق متّهم وضعيته قويمق، بو حقيقتلرڭ و بنم اونلره تعلّق ايدن حقوقلريمزڭ ضياعنى موجب اولمقله برابر، ديگرلرينڭ إنتحال و سرقتنه و تملّك و كندينه مال ايتمه‌سنه زمين إحضار ايتديگندن· بو بابده، أوّل أمرده و هر شيدن زياده حقيقتِ عاليه نامنه و حقوق حسابنه حقّمڭ محافظه‌سى، عادل محكمه‌ڭزڭ نظره آلاجغى ايلك جهتدر. و بر جُرم آلَتى اولمق توهّميله مصادره ايديلن رساله‌لريمڭ تضمّن ايتديگى حقائق، أهلِ فن و فلسفه‌يه و آقادمى محقّقلرينه قارشى إثباتمه مدار اولمق اوزره أليمده بولونماسى لازم گلديگندن· بو كشفيات و مناظراتِ علميه اوزرنده حاضرلغمى تثبيت ايتمك ايچون طرفمه إعاده‌سنى ايسترم. بنى محكوم ايتسه‌ڭز ده، اونلر محكوم اولاماز و حپسده دخى بنم آرقداشم اولماليدرلر.