دردنجى دليل:

مصادره ايديلن بتون كتابلريمى گورييورسڭز كه، سياسته آرقه‌لرينى چويروب، بتون قوّتلرى ايله ايمانه و قرآنه، آخرته متوجّه اولمالريدر. يالڭز ايكى اوچ رساله‌ده أسكى سعيد سكوتى ترك ايده‌رك، بعض غدّار مأمورلرڭ إشكنجه‌لرينه قارشى حدّت ايتمش· حكومته دگل، بلكه وظيفه‌سنى سوءِ إستعمال ايدن او مأمورلره إعتراض ايتمش، مظلومانه شكواسنى يازمش. فقط ينه او ايكى اوچ رساله‌يى محرم دييوب نشرينه إذن ويرمدم، خاص بر قسم دوستلريمه مخصوص قالمشلردر. حكومت أله باقار و ظاهره دقّت ايدر. قلبنه، گيزلى و خصوصى ايشلره باقمغه حكومتڭ حقّى يوقدر كه، هركس قلبنده و خانه‌سنده ايستديگنى ياپار و پادشاهلرى ذمّ ايدر، بگنمز.

أزجمله: يدى سنه أوّل (داها يڭى أذان چيقمه‌دن) بر قسم مأمورلر هم صاريغمه، هم خصوصى شافعيجه عبادتمه مداخله ايتمك ايسته‌ملرينه مقابل، بر قيصه رساله يازيلدى. بر زمان صوڭره يڭى أذان چيقدى· بن او رساله‌يى محرم ديدم، إنتشارينى منع ايتدم. هم أزجمله: دار الحكمة الإسلاميه‌ده بولونديغم زمان، تستّر آيتى عليهنده آوروپادن گلن إعتراضه قارشى بر جواب يازمشدم. بوندن بر سنه أوّل، أسكى مطبوع رساله‌لرمدن آلينان و اون يدنجى لمعه نامنده‌كى بر رساله‌نڭ بر مسئله‌سى اولارق قيد ايديلن و صوڭره يگرمى دردنجى لمعه إسمنى آلان قيصه‌جق تستّر رساله‌سى· ايلريده يڭى قانونلره تماس ايتمه‌مك ايچون، او تستّر رساله‌سنى ستر ايتدم. هر ناصلسه، ياڭليشلقله بر يره گوندريلمش. هم او رساله· مدنيتڭ، قرآنڭ آيتنه ايتديگى إعتراضه قارشى، مسكت و علمى بر جوابدر. بو حرّيتِ علميه، جمهوريت زماننده ألبته قيد آلتنه آلينماز.