برنجى دليل:

اون اوچ سنه‌دن بَرى، سياست لسانى اولان غزته‌لرى بو مدّت ظرفنده هيچ اوقومديغمه· طوقوز سنه اوطورديغم بارلا كوينده و طوقوز آى إقامت ايتديگم إسپارطه‌ده دوستلرم بيلييورلر. يالڭز إسپارطه توقيفخانه‌سنده، غايت إنصافسز بر غزته‌جى، دينسزجه‌سنه، رسالهِٔ نورڭ طلبه‌لرينه هجومنڭ بر فقره‌سى، ايسته‌مديگم حالده قولاغمه گيردى.

ايكنجى دليل:

اون سنه‌دن بَرى إسپارطه ولايتنده بولونويورم. دنيانڭ چوق تحوّلاتى ايچنده سياسته قاريشمق تشبّثنه دائر هيچ بر أماره، هيچ بر ترشّحات بزده گورولمديگيدر.

اوچنجى دليل:

هيچ بر خاطره گلمه‌ين، آنى اولارق بنم إقامتگاهم باصديريلدى، تام تحرّى ايديلدى. اون سنه‌دن بَرى تراكم ايدن أڭ محرم أوراقمى و كتابلريمى آلديلر. هم والى دائره‌سى، هم پوليس دائره‌سى، اونلرده سياستِ حكومته ايليشه‌جك هيچ بر مادّه‌يى بولامدقلرينى إعتراف ايتمه‌لريدر. عجبا دگل اون سنه، بلكه اون آى بنم گبى سببسز نفى ايديلن و مرحمتسز ظلم گورن و إشكنجه‌لى تضييق و ترصّد ايديلن بر آدمڭ أڭ محرم أوراقى ميدانه چيقسه، ظالملرڭ يوزلرينه صاورولاجق اون مادّه چيقماز مى؟

أگر دينيلسه: "يگرميدن زياده مكتوبلرڭ ياقالاندى؟" بن ده ديرم: او مكتوبلر، بر قاچ سنه ظرفنده يازيلمشلر. عجبا اون سنه ظرفنده اون دوسته، اون و يگرمى و يوز مكتوب چوق مى؟ مادام مخابره سربستدر و دنياڭزه ايليشمزلر، بيڭ اولسه ده بر صوچ تشكيل ايتمز.