اوچنجى مراقلى سؤال:

بو ياقينده إنگليز و ايتاليا گبى أجنبيلرڭ بو حكومته ايليشمه‌سيله، أسكيدن بَرى بو وطنده‌كى حكومتڭ حقيقى نقطهِٔ إستنادى و قوّهِٔ معنويه‌سنڭ منبعى اولان حميتِ إسلاميه‌يى تهييج ايتمكله شعائرِ إسلاميه‌نڭ بر درجه إحياسنه و بدعه‌لرڭ بر درجه دفعنه مدار اولاجغى حالده، نه‌دن شدّتله حرب عليهنده چيقدڭ و بو مسئله‌نڭ آسايشله حلّ ايديلمه‌سنى دعا ايتدڭ و شدّتلى بر صورتده مبتدعلرڭ حكومتلرى لهنده طرفدار چيقدڭ؟ بو ايسه، طولاييسيله بدعه‌لره طرفگيرلكدر؟

الجواب:

بز، فرَج و فرح و سُرور و فتوحات ايسترز. فقط كافرلرڭ قلنجى ايله دگل. كافرلرڭ قلنجلرى باشلرينى يسين· قلنجلرندن گلن فائده بزه لازم دگل. ذاتًا او متمرّد أجنبيلردر كه، منافقلرى أهلِ ايمانه مسلّط ايتديلر و زنديقلرى يتيشديرديلر. هم حرب بلاسى ايسه خدمتِ قرآنيه‌مزه مهمّ بر ضرردر. بزم أڭ فداكار و أڭ قيمتدار قارداشلريمزڭ أكثريسى قرق بشدن آشاغى اولديغندن، حرب واسطه‌سيله وظيفهِٔ قدسيهِٔ قرآنيه‌يى بيراقوب عسكره گيتمگه مجبور اولاجقديلر. بنم پاره‌م اولسه، حسنِ رضام ايله، بويله قيمتدار قارداشلريمڭ هر بريسنى عسكرلكدن قورتارمق ايچون، بدلِ نقديه بيڭ ليرا قدر ده اولسه، ويرردم. بويله يوزر قيمتدار قارداشلريمزڭ خدمتِ قرآنيهِٔ نوريه‌يى بيراقوب مادّى جهاد طوپوزينه أل آتمقده، يوز بيڭ ليرا كندى ضرريمزى حسّ ايدييوردم. حتّى ذكائينڭ بو بر ايكى سنه عسكرلگى، بلكه بيڭ ليرا قدر معنوى فائده‌سنى غائب ايتديردى. هر نه ايسه... قادرِ كلِّ شى، بر دقيقه‌ده بلوطلرله طولمش جوِّ هوايى سوپوروب تميزليه‌رك، سمانڭ برّاق يوزنده ضيادار گونشى گوسترديگى گبى، بو ظلماتلى و رحمتسز بلوطلرى ده إزاله ايدوب حقائقِ شريعتى گونش گبى گوسترر و اوجوز و دغدغه‌سز ويره‌بيلير. اونڭ رحمتندن بكلرز كه، بزه بهالى صاتماسين. باشده‌كيلرڭ باشلرينه عقل و قلبلرينه ايمان ويرسين، يتر. او وقت كندى كندينه ايش دوزه‌لير.