و حركاتِ مستحسنه‌سى ايسه حكمةً، مصلحةً، حياتِ شخصيه و نوعيه و إجتماعيه إعتباريله اونى تقليد و إتّباع ايتمك، غايت مستحسندر. چونكه هر بر حركتِ عاديه‌سنده، چوق منفعتِ حياتيه بولونديغى گبى، متابعت ايتمكله او آداب و عادتلر، عبادت حكمنه گچر. أوت مادام دوست و دشمنڭ إتّفاقيله، ذاتِ أحمديه (عصم) محاسنِ أخلاقڭ أڭ يوكسك مرتبه‌لرينه مظهردر. و مادام بِالإتّفاق نوعِ بشر ايچنده أڭ مشهور و ممتاز بر شخصيتدر. و مادام بيڭلر معجزاتڭ دلالتيله و تشكيل ايتديگى عالمِ إسلاميتڭ و كمالاتنڭ شهادتيله و مبلّغ و ترجمان اولديغى قرآنِ حكيمڭ حقائقنڭ تصديقيله، أڭ مكمّل بر إنسانِ كامل و بر مرشدِ أكملدر. و مادام ثمرهِٔ إتّباعيله ميليونلر أهلِ كمال، مراتبِ كمالاتده ترقّى ايدوب سعادتِ داريْنه واصل اولمشلردر. ألبته او ذاتڭ سنّتى، حركاتى، إقتدا ايديله‌جك أڭ گوزل نمونه‌لردر و تعقيب ايديله‌جك أڭ صاغلام رهبرلردر و دستور إتّخاذ ايديله‌جك أڭ محكم قانونلردر. بختيار اودر كه، بو إتّباعِ سنّتده حصّه‌سى زياده اوله. سنّته إتّباع ايتمه‌ين، تنبللك ايدر ايسه، خسارتِ عظيمه· أهمّيتسز گورور ايسه، جنايتِ عظيمه· تكذيبنى إشمام ايدن تنقيد ايسه، ضلالتِ عظيمه‌در.

ايكنجى مسئله:

جنابِ حق قرآنِ حكيمده:

﴿وَاِنَّكَ لَعَلٰى خُلُقٍ عَظِيمٍ﴾

فرمان ايدر. رواياتِ صحيحه ايله حضرتِ عائشهِٔ صدّيقه (رض) گبى صحابهِٔ گزين، حضرتِ پيغمبر عليه الصلاة والسلامى تعريف ايتدكلرى زمان

﴿خلُقُهُ اْلقُرْآنُ﴾

دييه تعريف ايدييورلردى. يعنى: "قرآنڭ بيان ايتديگى محاسنِ أخلاقڭ مثالى، محمّد عليه الصلاة والسلامدر. و او محاسنى أڭ زياده إمتثال ايدن و فطرةً او محاسن اوستنده ياراديلان اودر."