ايشته بويله بر ذاتڭ أفعال، أحوال، أقوال و حركاتنڭ هر بريسى، نوعِ بشره برر موده‌ل حكمنه گچمگه لايق ايكن، اوڭا ايمان ايدن و امّتندن اولان غافللرڭ، (سنّتنه أهمّيت ويرمه‌ين وياخود تغيير ايتمك ايسته‌ين) نه قدر بدبخت اولديغنى ديوانه‌لر ده آڭلار.

اوچنجى مسئله:

رسولِ أكرم عليه الصلاة والسلام، خلقةً أڭ معتدل بر وضعيتده و أڭ مكمّل بر صورتده خلق ايديلديگندن، حركات و سكناتى، إعتدال و إستقامت اوزرينه گيتمشدر. سِيَرِ سنيه‌سى، قطعى بر صورتده گوسترر كه: هر حركتنده إستقامت و إعتدال اوزره گيتمش، إفراط و تفريطدن إجتناب ايتمشدر.

أوت رسولِ أكرم عليه الصلاة والسلام،

﴿فَاسْتَقِمْ كَمَا اُمِرْتَ﴾

أمرينى تماميله إمتثال ايتديگى ايچون، بتون أفعال و أقوال و أحوالنده إستقامت، قطعى بر صورتده گورونويور. مثلا: قوّهِٔ عقليه‌نڭ فساد و ظلمتى حكمنده‌كى إفراط و تفريطى اولان غباوت و جربزه‌دن مبرّا اولارق، حدِّ وَسَط و مدارِ إستقامت اولان حكمت نقطه‌سنده قوّهِٔ عقليه‌سى دائما حركت ايتديگى گبى· قوّهِٔ غضبيه‌نڭ فسادى و إفراط و تفريطى اولان قورقاقلق و تهوّردن منزّه اولارق، قوّهِٔ غضبيه‌نڭ مدارِ إستقامتى و حدِّ وسطى اولان شجاعتِ قدسيه ايله قوّهِٔ غضبيه‌سى حركت ايتمكله برابر· قوّهِٔ شهويه‌نڭ فسادى و إفراط و تفريطى اولان خُمود و فجوردن مصفّا اولارق، او قوّه‌نڭ مدارِ إستقامتى اولان عفّتده، قوّهِٔ شهويه‌سى دائما عفّتى، أعظمى معصوميت درجه‌سنده رهبر إتّخاذ ايتمشدر. و هكذا... بتون سننِ سنيه‌سنده، أحوالِ فطريه‌سنده و أحكامِ شرعيه‌سنده، حدِّ إستقامتى إختيار ايدوب ظلم و ظلمات اولان إفراط و تفريطدن، إسراف و تبذيردن إجتناب ايتمشدر. حتّى تكلّمنده و أكل و شربنده، إقتصادى رهبر و إسرافدن قطعيًا إجتناب ايتمشدر.