و او إشارتلره و رمزلره تام مظهر و او وظيفه‌لرى بِحقٍّ گوره‌جك، رسالهِٔ نور گبى بر تفسيرِ قرآنى اولاجق. حالبوكه رسالهِٔ نور بو مذكور نقطه‌ده ايلرى اولديغى، اونى اوقويانلرجه شبهه‌سز اولماسيله دلالت ايدر كه· او آيتلر بِالخاصّه رسالهِٔ نوره باقوب اوڭا إشارت ايدييورلر.

برنجيسى:

سورهِٔ نوردن آيت النوردر كه، رسالهِٔ نورڭ رسائل النور و رسالهِٔ النور و رسالة النور ناملريله سببِ تسميه‌سنڭ اون آلتى سببندن بر سبب اولديغندن، برنجى اولارق اونى بيان ايتمك گركدر. بو آيت النور:

﴿اَللّٰهُ نُورُ السَّمٰوَاتِ وَالْاَرْضِ مَثَلُ نُورِهِ كَمِشْكٰوةٍ فِيهَا مِصْبَاحٌ اَلْمِصْبَاحُ فِى زُجَاجَةٍ اَلزُّجَاجَةُ كَاَنَّهَا كَوْكَبٌ دُرِّىٌّ يُوقَدُ مِنْ شَجَرَةٍ مُبَارَكَةٍ زَيْتُونَةٍ لَا شَرْقِيَّةٍ وَلَا غَرْبِيَّةٍ يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ نُورٌ عَلٰى نُورٍ يَهْدِى اللّٰهُ لِنُورِهِ مَنْ يَشَاءُ وَيَضْرِبُ اللّٰهُ الْاَمْثَالَ لِلنَّاسِ وَاللّٰهُ بِكُلِّ شَيْءٍ عَلِيمٌ﴾

شو آيتِ نوريه‌نڭ معناجه چوق طبقاتى و وجوهِ كثيره‌سى واردر. و او طبقه‌لردن و وجهلردن إشارى و رمزى بر وجهى، معناجه و جفرجه نورلى بر تفسيرى اولان رسالهِٔ النور و رسالة النوره درت بش جمله‌سيله اون جهتدن باقييور. و او طبقه‌لردن و او وجهلردن بر طبقه و بر پرده دخى معجزانه ألكتريقدن خبر ويرييور.