اون سكزنجى لمعه

﴿بِسْمِ اللّٰهِ الرَّحْمٰنِ الرَّحِيمِ﴾

حضرتِ غوثِ أعظم شيخِ گيلانىنڭ (رض) صراحت درجه‌سنده‌كى كرامتِ غيبيه‌سنى تأييد و تقويه ايدن حضرتِ أسد اللّٰه الغالب على ابن أبى طالب رضى اللّٰه عنه و كرّم اللّٰه وجهه، قصيدهِٔ أرجوزهِٔ مشهوره‌سنده عينًا إخباراتِ غوثيه‌يى تصديق ايدوب إشارت ايدييور.

مجموعة الأحزابڭ (٢٨٥) نجى صحيفه‌سندن (٧٩٥) نجى صحيفه‌سنه قدر او أرجوزه‌در. او أرجوزه‌نڭ موضوعى و ايچنده‌كى مقصدِ أصلى· إسمِ أعظمى تضمّن ايدن آلتى إسمڭ أهمّيتنى بيان ايتمك، هم او مناسبتله إستقبالده‌كى بر قسم امورِ غيبيه‌يه و تأسيسِ إسلاميتده بر قسم مجاهداتنه إشارت ايتمكدر.

أوت حضرتِ إمام (رض) استادى اولان حبيب اللّٰه عليه الصلاة والسلامدن آلديغى درسڭ بر قسمنى إشارى بر صورتده ذكر ايدييور. فتحِ خيبرده‌كى هم معجزهِٔ نبويه هم كرامتِ عَلويه اولان خارقه واقعه‌يى بحث ايتديگى گبى، تأسيسِ إسلاميته تماس ايدن مهمّ نقطه‌لرى ده بحث ايدييور. صوڭره إستقباله باقييور.

پيغمبرِ ذىشان عليه الصلاة والسلامدن آلديغى درسله، بر قسم أعرابڭ اوڭا قارشى عصيانلرندن حدّت ايده‌رك ديمش:

﴿فِى عِلْمِ تِسْعِينَ حِسَابِ الْفَارِسِى ٭ مِن بَعْدِ قَرْنٍ تَاسِعِ الْمَعَاصِى﴾

﴿سَتَظْهُرُ الْفُرْسُ عَلَى الْاَعْرَابِ ٭ تَقْتُلُهُمْ كَقَتْلَةِ الدَّوَابِ﴾