اوچنجى أساس:

هم او معجزاتِ باهره صاحبى اولان وحدانيت دلاّلى و سعادتِ أبديه مژده‌جيسى، كندى ذاتِ مباركنده اويله أخلاقِ عاليه و وظيفهِٔ رسالتنده اويله سجاياىِ ساميه و تبليغ ايتديگى شريعت و ديننده اويله خصائلِ غاليه واردر كه· أڭ شديد دشمن دخى اونى تصديق ايدييور، إنكاره مجال بولامييور. مادام ذاتنده و وظيفه‌سنده و ديننده، أڭ يوكسك و گوزل أخلاقلرى و أڭ علوى و مكمّل سجيه‌لرى و أڭ قيمتدار و مقبول خصلتلرى بولونويور· ألبته او ذات، موجوداتده‌كى كمالاتڭ و أخلاقِ عاليه‌نڭ مثالى و ممثّلى و تمثالى و استاديدر. اويله ايسه، ذاتنده و وظيفه‌سنده و ديننده شو كمالات ايسه· حقّانيتنه و صدقنه او قدر قوّتلى بر نقطهِٔ إستناددر كه، هيچ بر جهتده صارصيلماز.

دردنجى أساس:

هم معدنِ كمالات و معلّمِ أخلاقِ عاليه اولان او دلاّلِ وحدانيت و سعادت، كندى كندينه سويله‌مييور· بلكه سويلتديريلييور. أوت خالقِ كائنات طرفندن سويلتديريلييور. استادِ أزليسندن درس آلير، صوڭره درس ويرر. چونكه سابق إشارتلرده قسمًا بيان ايديلن بيڭلر دلائلِ نبوّتله· خالقِ كائنات بتون او معجزاتى اونڭ ألنده خلق ايتمكله گوستردى كه· او، اونڭ حسابنه قونوشويور، اونڭ كلامنى تبليغ ايدييور. هم اوڭا گلن قرآن ايسه ايچنده، طيشنده قرق وجهِ إعجاز ايله گوسترر كه، او جنابِ حقّڭ ترجمانيدر. هم او كندى ذاتنده بتون إخلاصيله و تقواسيله و جدّيتيله و أمانتيله و سائر بتون أحوال و أطواريله گوسترر كه· او كندى نامنه، كندى فكريله ديمييور.. بلكه خالقى نامنه قونوشويور. هم اونى ديڭله‌ين بتون أهلِ حقيقت، كشف و تحقيق ايله تصديق ايتمشلر و علم اليقين ايمان ايتمشلر كه· او كندى كندينه قونوشمييور، بلكه خالقِ كائنات اونى قونوشديرييور، درس ويرييور، اونڭله درس ويرديرييور. اويله ايسه اونڭ صدق و حقّانيتى، بو درت غايت قوّتلى أساسلرڭ إجماعنه إستناد ايدر.