يگرمى دردنجى مكتوبڭ برنجى ذيلى

﴿بِاسْمِهِ ٭ وَ اِنْ مِنْ شَيْءٍ اِلَّا يُسَبِّحُ بِحَمْدِهِ﴾

﴿بِسْمِ اللّٰهِ الرَّحْمٰنِ الرَّحِيمِ﴾

﴿قُلْ مَا يَعْبَؤُا بِكُمْ رَبِّى لَوْلَا دُعَاؤُكُمْ﴾

يعنى: "أى إنسانلر! دعاڭز اولمازسه نه أهمّيتڭز وار." مئالنده‌كى آيتڭ بش نكته‌سنى ديڭله:

برنجى نكته:

دعا بر سرِّ عظيمِ عبوديتدر. بلكه عبوديتڭ روحى حكمنده‌در. چوق يرلرده ذكر ايتديگمز گبى، دعا اوچ نوعدر:

برنجى نوع دعا:

إستعداد لسانيله‌در كه· بتون حبوبات، تخملر لسانِ إستعداد ايله فاطرِ حكيمه دعا ايدرلر كه: "سنڭ نقوشِ أسماڭى مفصّل گوسترمك ايچون، بزه نشو و نما وير، كوچك حقيقتمزى سُنبلله و آغاجڭ بيوك حقيقتنه چوير."

هم شو إستعداد لسانيله دعا نوعندن بريسى ده شودر كه: أسبابڭ إجتماعى، مسبَّبڭ ايجادينه بر دعادر. يعنى: أسباب بر وضعيت آلير كه، او وضعيت بر لسانِ حال حكمنه گچر و مسبّبى قديرِ ذو الجلالدن دعا ايدر، ايسترلر. مثلا: صو، حرارت، طوپراق، ضيا بر چكردك أطرافنده بر وضعيت آلارق، او وضعيت بر لسانِ دعادر كه: "بو چكردگى آغاج ياپ، يا خالقمز!" ديرلر. چونكه او معجزهِٔ خارقهِٔ قدرت اولان آغاج· او شعورسز، جامد، بسيط مادّه‌لره حواله ايديلمز، حواله‌سى محالدر. ديمك إجتماعِ أسباب بر نوع دعادر.