بر سؤال:

دينيلييور كه: سن چوق شيلره متواتر ديرسڭ، حالبوكه بز اونلرڭ چوغنى يڭى ايشيدييورز. متواتر بر شى بويله گيزلى قالماز؟

الجواب:

علماءِ شريعت ياننده چوق متواتر و بديهى شيلر وار كه، اونلردن اولميانه گوره مجهولدر. أهلِ حديث ياننده ده چوق متواتر وار، سائرلرڭ ياننده آحادى ده اولمايور و هكذا... هر فنّڭ أهلِ إختصاصى، او فنّه گوره بديهياتى، نظرياتى بيان ايديلير. عموم خلق ايسه، او فنّڭ أهلِ إختصاصنه إعتماد ايدر، تسليم اولور ويا ايچنه گيرر، گورور. شيمدى خبر ويرديگمز حقيقى متواتر ويا معنوى متواتر ويا تواتر حكمنده قطعيتى إفاده ايدن واقعه‌لر، هم أهلِ حديث، هم أهلِ شريعت، هم أهلِ اصول الدّين، هم أكثر طبقاتِ علماده حكمنى اويله گوسترمش. غفلتده بولونان عوام ويا گوزينى قپايان نادانلر بيلمزلرسه، قباحت اونلره عائددر.

بشنجى مثال:

إمامِ بغوى تخريجى و تصحيحى ايله خبر ويرييور كه: علىّ ابن الحَكمڭ غزوهِٔ خندقده كفّارڭ ضربه‌سيله آياغى قيريلدى. رسولِ أكرم عليه الصلاة والسلام مسح ايتدى. دقيقه‌سنده اويله شفا بولدى كه، آتندن اينمدى.

آلتنجى مثال:

باشده إمامِ بيهقى، أهلِ حديث خبر ويرييورلر كه: إمامِ على غايت خسته ايدى. إضطرابندن كندى كندينه دعا ايدوب ايڭله‌يوردى. رسولِ أكرم عليه الصلاة والسلام گلدى، ديدى:

﴿اَللّٰهُمَّ اشْفِهِ﴾

و آياغيله حضرتِ علىيه طوقوندى، "قالق!" ديدى. بردن شفا بولدى. إمامِ على دير كه: "اوندن صوڭره او خسته‌لغى هيچ گورمدم."

يدنجى مثال:

شُرَحبيل الجحفينڭ مشهور قصّه‌سيدر كه: آووجنده أتدن بر اور واردى كه، قلنجى و آتڭ ديزگيننى طوته‌مييوردى. رسولِ أكرم عليه الصلاة والسلام أليله آووجنده‌كى اورى مسح ايتدى و مبارك أليله اوغدى. او اوردن هيچ بر أثر قالمادى.