﴿بِسْمِ اللّٰهِ الرَّحْمٰنِ الرَّحِيمِ﴾

اَصْبَحْنَا

&﴿(٠١): (اَصْبَحْنَا) بز صباحه گيردك. بو صباحڭ ملكى ده اللّٰهه شاهددر. بو بابده ايكى نكته وار: برنجى نكته شودر كه: هر شى حالِ حاضر وجوديله جنابِ حقّڭ وجودينه و وحدتنه شهادت ايتدكلرى گبى، منتظمًا تبدّل ايدوب آرقه‌سنده أمثاللرينه ير ويرمك ايچون گيتمه‌سيله، بر تجدّد صورتى آلتنده عظيم بر سلسله‌يى گوسترمكله، جنابِ حقّڭ وجود و وحدانيتنه دليل ديمكدر. الحاصل: (شَهِيدٌ) فقره‌سيله حالِ حاضر وجودينى و (دَلِيلٌ) جمله‌سيله ده گلوب گچن أمثاللرينڭ تركيبندن تشكّل ايدن سلسله‌سنى گوسترر. ايكنجى نكته: قاعدهِٔ نحويه ايله (اْلاٰلَاءُ ِللّٰهِ شَهِيدَةٌ) ديمك لازم گليركن (للّٰهِ شَهِيدٌ) دينيلييور. چونكه هر بر (اٰلَاء) تك باشيله بر شاهددر. (شَهِيدٌ) مذكّر لفظيله هر بر فرد شهادت ايدر معناسنى إفاده ايدييور. أگر (شَهِيدَةٌ) ديسه ايدى، جماعتڭ معناسنى إفاده ايدردى. مثلا (وَالرُّبُوبِيَّةُ ِللّٰهِ شَهِيدٌ) دينيلييور. چونكه ربوبيتدن مراد، جنابِ حقّڭ ربوبيتيله ايتديگى تربيه‌لر، تدبيرلر شهادت ايدييور ديمكدر. نفسِ ربوبيت گورونمييور، فقط اونڭ أثرى اولان تربيه‌لر و تدبيرلر گورونويور كه· گورونن شيلرى شاهد ياپمق ايچون (شَهِيدٌ) دينيلمش. أگر (شَهِيدَةٌ) دينيلسه ايدى، طوغريدن طوغرىيه ربوبيته راجع اولوردى. (اِنَّ رَحْمَتَ اللّٰهِ قَرِيبٌ مِنَ الْمُحْسِنِينَ) آيتنڭ دخى، رحمت مؤنّث ايكن (قَرِيبَةٌ) دينمه‌يوب (قَرِيبٌ) دينمه‌سنڭ نكته‌سى· گونش حكمنده‌كى عالى، كلّى رحمتڭ ياقينلغنى إفاده ايتمكدن زياده، او گونشڭ شعاعلرى اولان خصوصى إحسانلر مراد ايديلديگندن، هر بر محسنه ياقين بر إحسان گورولور. إحسان لفظى ايسه مذكّردر. اونڭ حقّى (قَرِيبٌ) در. هم جنابِ حقّڭ محسنلره رحمتيله قريب اولديغنى إفاده ايچوندر كه، (قَرِيبَةٌ) دينيلمه‌دى.﴾|@

وَ اَصْبَحَ الْمُلْكُ ِللّٰهِ شَهِيدٌ ٭ وَ الْكِبْرِيَاءُ عَلَى اللّٰهِ دَلِيلٌ