جزئى و ياقين يرلرده و كلّى و عظمتليلر كلّى و بيوك مقاملرده گورولور. فقط بعضًا جزئى و خصوصى بر حادثه، بيوك بر عالمى إستيلا ايدر. هانگى كوشه‌ده ديڭله‌نيلسه، او حادثه ايشيديلير. و بعضًا ده بيوك تحشيدات، دشمنڭ قوّتنه قارشى دگل، بلكه إظهارِ حشمت ايچون ياپيلير. مثلا: حادثهِٔ محمّديه (عصم) و وحىِ قرآنڭ حادثهِٔ قدسيه‌سى، عموم سماوات مملكتنده، حتّى او مملكتڭ هر كوشه‌سنده أڭ مهمّ بر حادثه اولديغندن، طوغريدن طوغرىيه چوق اوزاق و چوق يوكسك اولان قوجه سماواتڭ برجلرينه نوبتدارلر ديزيلوب، ييلديزلردن منجنيقلرى آتارق، جاسوس شيطانلرى طرد و دفع ايدييورلر وضعيتنده گوسترمك و إفاده ايتمكله، وحىِ قرآنينڭ درجهِٔ حشمتنى و شعشعهِٔ سلطنتنى و هيچ بر جهتده شبهه گيرمه‌ين درجهِٔ حقّانيتنى إعلانه بر إشارتِ ربّانيه اولارق، او وقتده و او عصرده داها زياده ييلديزلر دوشوريلييورمش و آتيلييورمش. قرآنِ معجز البيان دخى، او إعلانِ تكوينىيى ترجمه ايدوب إعلان ايدييور و او إشارتِ سماويه‌يه إشارت ايدر. أوت بر ملائكه‌نڭ اوفورمسيله اوچوريلابيلير اولان جاسوس شيطانلرى، بويله بر إشارتِ عظيمهِٔ سماويه ايله، ملائكه‌لرله مبارزه ايتديرمك، ألبته او وحىِ قرآنينڭ حشمتِ سلطنتنى گوسترمك ايچوندر.

هم بو حشمتلى اولان بيانِ قرآنى و عظمتلى تحشيداتِ سماويه ايسه· جنّيلرڭ، شيطانلرڭ، سماوات أهلنى مبارزه‌يه و مدافعه‌يه سَوق ايده‌جك بر إقتدارلرى، بر مدافعه‌لرى بولونديغنى إفاده ايچون دگل، بلكه قلبِ محمّديدن (عصم) تا سماوات عالمنه، تا عرشِ أعظمه قدر اولان اوزون يولده، هيچ بر يرده جنّ و شيطانڭ مداخله‌لرى اولمامسنه إشارت ايچون، وحىِ قرآنى، قوجه سماواتده، عموم ملائكه‌جه مدارِ بحث اولان بر حقيقتدر كه، بر درجه اوڭا تماس ايتمك ايچون، شيطانلر تا سماواته قدر چيقمغه مجبور اولوب، هيچ بر شيئه موفّق اولاميه‌رق رجم ايديلمسيله إشارت ايدييور كه· قلبِ محمّدىيه (عصم) گلن وحى و حضورِ محمّدىيه (عصم) گلن جبرائيل و نظرِ محمّدىيه (عصم) گورونن حقائقِ غيبيه، صاغلام و مستقيمدر، هيچ بر جهتله شبهه گيرمز دييه قرآنِ معجز البيان معجزانه خبر ويرييور.