عجبا حرارت زماننده وجودڭ إداره‌سندن فضله اولان قانڭ چوغالمه‌سى و بولاشيق بعض موادِّ مضرّه‌يى حامل أورده‌ده جريان ايدن ملوّث قانه مسلّط بلكه مأمور اولان سيورىسينك و پيره‌لر، فطرى حجّاملر اولماسينلر مى؟ محتمل...

﴿سُبْحَانَ مَنْ تَحَيَّرَ فِى صُنْعِهِ الْعُقُولُ﴾

نفسمله مجادله ايتديگم بر زمانده، نفسم كندنده گورديگى نعمتِ إلٰهيه‌يى كندى مالى توهّم ايده‌رك غروره، إفتخاره، تمدّحه باشلادى.

بن اوڭا ديدم كه: "بو ملك سنڭ دگل، أمانتدر."

او وقت نفس غرور و إفتخارى بيراقدى، فقط تنبللگه باشلادى. "بنم مالم اولميانه نه باقايم؟ ضايع اولسون بڭا نه؟" ديدى.

بردن گوردم: بر سينك، أليمه قوندى. أمانت اللّٰه اولان گوزينى، يوزينى، قنادلرينى گوزلجه تميزله‌مگه باشلادى. بر نفرڭ ميرى سلاحنى، ألبسه‌سنى گوزلجه تميزله‌ديگى گبى، سينك ده تميزله‌يوردى.

نفسمه ديدم: "باق!" باقدى، تام درس آلدى. او سينك ايسه، مغرور و تنبل نفسمه خواجه و معلّم اولدى.

سينك پيسلگى، طب جهتيله ضررى يوق بر مادّه‌در كه، بعضًا طاتلى بر شروبدر. فقط سينك، يديگى بيڭلر مختلف مضر مادّه‌لرڭ و ميقروبلرڭ و سملرڭ منشئى اولمقله· سينكلر كوچوجك إستحاله و تصفيه ماكينه‌لرى حكمنه گچمه‌لرى، حكمتِ ربّانيه‌دن اوزاق دگلدر، بلكه شأنندندر.