هم هر گونده ميليارلرله يبانى حيوانلر و قوشلرڭ جنازه‌لرينى طوپلامقله روىِ زمينى او تعفّناتدن تميزله‌مك و ذىحياتلرى او أليم و حزين منظره‌لردن قورتارمق ايچون، نظافت و صحّيه مأمورلرى حكمنده اولان قارتاللر مِثللو، كرامتكارانه گيزلى و اوزاق، بش آلتى ساعت مسافه‌دن بر سَوقِ ربّانى ايله او جنازه‌نڭ يرينى حسّ ايدن، گيدن و قالديران آكل اللحم قوشلرى و وحشى حيوانلرى خلق ايتمش. أگر بو برّيه صحّيه‌لرى غايت مكمّل، إنتظامپرور، وظيفه‌دار اولماسه ايديلر، زمين يوزى آغلاناجق بر شكل آلاجقدى.

أوت آكل اللحم حيوانلرڭ حلال رزقلرى، وفات ايتمش حيوانلرڭ أتلريدر. حياتده اولان حيوانلرڭ أتلرى اونلره حرامدر. أگر ييسه‌لر، جزا گورورلر.

﴿حَتّٰى يَقْتَصُّ الْجَمَّاءُ مِنَ الْقَرْنَاءِ﴾

(أو كما قال) يعنى: "بوينوزسز اولان حيوانڭ قصاصى، قيامتده بوينوزليدن آلينير." دييه إفادهِٔ حديثيه گوسترييور كه· گرچه جسدلرى فنا بولور، فقط أرواحلرى باقى قالان حيوانات مابيْننده دخى اونلره مناسب بر طرزده دارِ بقاده مجازات و مكافاتلرى واردر. اوڭا بناءً جاناوارلره صاغ حيوانلرڭ أتلرى حرامدر دينيله‌بيلير.

و هم كوچوجك حيوانلرڭ جنازه‌لرينى و نعمتڭ كوچوجك پارچه‌لرينى و دانه‌لرينى طوپلامق وظيفه‌سيله قارينجه‌لرى نظافت مأمورلرى اولارق، هم نعمِ إلٰهيه‌نڭ كوچوجك پارچه‌لرينى تلفدن و چيگنه‌مكدن و حقارتدن و عبثيتدن صيانت ايتمكله و كوچوجك حيواناتڭ جنازه‌لرينى طوپلامقله، صحّيه مأمورلرى گبى توظيف اولونمشلر.