أى أهلِ حلّ و عقد! عجبا هيچ ممكن ميدر كه· (يگرمى بش سنه أوّل غزته‌لرڭ يازديغى گبى) بر مقاله ايله اوتوز بيڭ آدمى كندى فكرينه چويرن و قوجه حركت اوردوسنڭ نظرِ دقّتنى كندينه چويرن و إنگليزڭ باشپاپاسنڭ آلتى يوز كلمه ايله ايستديگى سؤاللرينه آلتى كلمه ايله جواب ويرن و بدايتِ حرّيتده أڭ مشهور بر ديپلومات گبى نطق سويله‌ين بر آدمڭ يوز يگرمى رساله‌سنده دنيايه، سياسته باقه‌جق يالڭز اونبش كلمه مى بولونور؟ هيچ بر عقل قبول ايدر مى كه· بو آدم سياستى تعقيب ايدييور و مقصدى دنيادر و حكومته ايليشمكدر. أگر فكرى، سياست و حكومته ايليشمك اولسه ايدى، بويله بر آدم بر تك رساله‌سنده صريحًا، إشارةً، يوز يرده مقصدينى إحساس ايده‌جكدى. عجبا او آدمڭ مقصدى سياستجه تنقيد اولسه ايدى، يالڭز تستّر و إرثيته دائر أسكى زماندن بَرى جارى بر ايكى دستوردن باشقه مدارِ تنقيد بولناماز مى ايدى؟

أوت قوجه بر إنقلابى ياپان بر حكومتڭ رژيمنه مخالف بر فكرِ سياستى تعقيب ايدن بر آدم، بر ايكى معلوم مادّه‌لر دگل، يوز بيڭلر مادّهِٔ تنقيد بولابيليردى. گويا حكومتِ جمهوريه‌نڭ يالڭز إنقلابى بر ايكى كوچك مسئله‌در. بن ده اونى هيچ بر تنقيد مقصدم اولماديغى حالده، أسكيدن يازديغم بر ايكى كتابمده ذكر ايتديگم بر ايكى كلمه وارمش دييه "حكومتڭ رژيمنه و إنقلابنه هجوم ايدييور" دينيلمش. ايشته بن ده صورويورم: بويله أڭ أدنا بر جزايه مدار اولاميان علمى بر مادّه‌يه قوجه بر مملكتى مشغول ايدوب أنديشه ويره‌جك بر شكل ويريلير مى؟