﴿بِاسْمِهِ سُبْحَانَهُ﴾

صوڭ مدافعات

آلتمش كسور صحيفه‌دن عبارت اولان إتهامكارانه قرارنامه‌ده‌كى (اون ايكى صحيفه‌لك) شخصمه عائد قسمنه قارشى مدافعه‌مدر:

قرارنامه‌ده عليهمزه ذكر ايديلن مادّه‌لره قارشى، محكمه‌نڭ ضبطنه گچن مدافعاتمده قطعى جوابلرى واردر. بو قرارنامه نامنده‌كى أصلسز و وهملى إتهامنامه‌يه قارشى، اون طوقوز صحيفه‌دن عبارت إعتراضنامه‌مى و يگرمى طوقوز صحيفه‌دن عبارت صوڭ مدافعاتمى إبراز ايدييورم. بو ايكى مدافعه، صورغو حاكملرينڭ قرارنامه‌لرينڭ بتون مؤاخذه نقطه‌لرينى و أساس إتهاملرينى قطعى بر صورتده ردّ ايله چوروتويور، أصلسز اولديغنى گوسترييور. يالڭز بوراده، قرارنامه‌نڭ إستناد ايتديگى و إتهام ايدنلرڭ نره‌دن آلداندقلرينى و بو أصلسز مؤاخذه‌يى نره‌دن إقتباس ايتدكلرينى گوسترر "بش عمده" اولارق سويله‌يه‌جگم.

برنجى عمده:

رسالهِٔ نورڭ يوز يگرمى پارچه‌سندن ايكى ئوچ درت پارچه‌سنده اون اونبش فقره‌يى بهانه طوتوب، بنى و رسالهِٔ نورى حكومتڭ پرنسبلرينه مخالف و رژيمنه قارشى معارض و أمنيتِ داخليه‌سنى إخلاله تشبّث إتهامى ايله غايت أصلسز بر دعوادر.

الجواب

بن ده ديرم: عجبا عموم آوروپانڭ مالِ مشتركى اولان مدنيت و يالڭز بو زمانڭ إلجاآتنه بناءً حكومتِ جمهوريه‌نڭ او مدنيتڭ بر قسم قانونلرينى قبول ايتمه‌سيله، او مدنيتڭ منفعتلى قسمنه دگل، بلكه قصورلى قسمنه، حقائقِ قرآنيه حسابنه اولارق مدافعاتِ علميه‌مه هانگى صورتله "حكومتڭ پرنسبنه و حكومتڭ رژيمنه مخالف و حكومتڭ إنقلابى عليهنه حركت نامى ويريلييور؟ عجبا بو حكومتِ جمهوريه، آوروپا مدنيتنڭ قصورلى قسمنڭ دعوا وكيللگنه تنزّل ايدر مى؟ و او قصورلى مدنيتڭ إسلاميته مخالف قانونلرى، أسكى زماندن بَرى حكومتڭ هدفى ميدر؟ حكومته معارض وضعيت آلمق نره‌ده· بو قسم قصورلى مدنيت قانونلرينه قارشى حقائقِ قرآنيه‌يى علمى بر صورتده مدافعه ايتمك نره‌ده؟ قرآنِ حكيمڭ آياتِ قطعيه‌سيله، بيڭ اوچيوز سنه‌دن بَرى، ميليونلر تفسيرلرنده و حالاً كتبخانه‌لرده طولو اولان تفسيرلرده

﴿لِلذَّكَرِ مِثْلُ حَظِّ اْلاُنْثَيَيْنِ ٭ فَِلاُمِّهِ السُّدُسُ ٭ يَا اَيُّهَا النَّبِىُّ قُلْ لِاَزْوَاجِكَ... الخ ٭ فَانْكِحُوا مَا طَابَ لَكُمْ﴾

إلٰى آخر گبى آيتلرڭ حقائقِ قدسيه‌لرينى آوروپا فيلسوفلرينڭ إعتراض و تجاوزاتنه قارشى اوتوز سنه‌دن بَرى يازديغم مدافعاتِ علميه‌مى "حكومتڭ إنقلابنه، پرنسبنه و رژيمنه مخالفتِ قصدى وار" دييه بنى إتهام ايتمك، اويله بر ظاهر غرض و اويله بر أساسسز بر وهمدر كه· بوراده‌كى محكمهِٔ عادله‌يه تعلّق ايتمسه ايدى، مدافعه و جواب ويرمگى لايق گورمزدم.