مسجديمزڭ قپانماسى مناسبتيله، درت نقطه‌دن عبارت، بڭا وحشيانه ظلم ايدن محلّى ناحيه مديريله بر قاچ آرقداشى و قضا قائمِمقامنڭ، شخصيتلرينه و مأموريتلرينڭ سوءِ إستعماللرينه قارشى بر شكوانامه‌در كه· او رساله‌يى كيمسه‌يه ويرمدم. چونكه، هيچ بر كيمسه‌ده بولونمامشدر. يالڭز فهرسته‌ده بحثى وار.

إدّعانامه‌ده تلويحاتِ تسعه نامنده طريقتڭ بعض حقائقنه دائر بر رساله‌ده مدارِ تنقيد بولونان شو فقره: "أهلِ سنّت و جماعته منسوب بر قسم أهلِ سياست و بر قسم غافل إنسانلر، أهلِ طريقتڭ ايچنده گوردكلرى بعض سوءِ إستعمالاتى و بر قسم خطيئاتى بهانه ايده‌رك بو خزينهِٔ عظمايى قپاتميه، بلكه تخريب ايتمك و بر نوع آبِ حياتى طاغيدان او كوثر منبعنى قوروتمغه چاليشييورلر. و مركزِ حكومت اولان إستانبولى بش يوز أللى سنه بتون عالمِ خرستيانىنڭ قارشيسنده محافظه ايتديرن، إستانبولده بش يوز يرده فيشقيران أنوارِ توحيد و مركزِ إسلاميتده‌كى أهلِ ايمانڭ مهمّ بر نقطهِٔ إستنادى او بيوك جامعلرڭ آرقه‌لرنده‌كى تكيه‌لرده او اللّٰه اللّٰه ديينلرڭ قوّةِ ايمانيه‌لرى و معرفتِ إلٰهيه‌دن گلن بر محبّتِ روحانيه ايله جوش و خروشلريدر.

ايشته أى إنصافسز حميتفروشلر و ساخته‌كار ملّيتپرورلر! طريقتڭ حياتِ إجتماعيه‌مزده بو حسنه‌سنى چوروته‌جك هانگى سيّئاتلردر، سويله‌يڭز." دييه يازيلى اولان فقره عليهمه تنقيدكارانه بر مادّه اولارق درج ايديلمش.

الجواب:

بو فقره حقيقت نقطه‌سنده چوق خطيئاتمى عفو ايتديرر مبارك بر فقره‌در. هم بو فقره، حكومتجه طريقتڭ ياساق اولديغنه دائر قانونلرڭ نشرندن خيلى زمان أوّل اولمقله برابر· بو طريقت تعليمى دگل، طريقتڭ بر حقيقتِ علميه‌سنى علمًا بيان ايتمكدر. بوڭا ياساق تماس ايده‌مز. هم بو ملّتڭ بيڭ سنه‌دن بَرى روحلرينى فيضلنديرن و مزارستانده يارى أجدادلرى اونڭله مربوط اولان بدعه‌سز، خالص و حقيقتِ تقوا اولان بر نوع طريقتڭ قطعى بر إجتماعى فائده‌سنى بيان ايتمكلگم، ناصل عليهمده إستعمال ايديله‌بيلير؟ هم بو رساله تحرّياتده هيچ بر دوستمده بولونمادى. ديمك كه اونڭ نشرينه چاليشمييورم. يالڭز فهرسته‌ده بحثنى گورمشسڭز.