الجواب:

أوّلا، بن دخى صورانلردن صورويورم: بويله بر جمعيتِ سياسيه‌نڭ، بزم طرفمزدن وجودينه دائر هانگى وثيقه، هانگى أماره‌لر وار و پاره ايله تشكيلات ياپديغمزه هانگى دليل و هانگى حجّت بولمشلر كه، بو قدر مصرّانه صورويورلر؟ بن اون سنه‌در إسپارطه ولايتنده شدّتلى ترصّد آلتنده بولونمشم. بر ايكى خدمتكار و اون گونده بر ايكى يولجيدن باشقه آدملرى گورمه‌ين غريب، كيمسه‌سز، دنيادن اوصانمش، سياستدن غايت شدّتله نفرت ايتمش و قوّتلى سياسى مخالف جمعيتلرڭ نه قدر عكس العمللرى ايله ضررلى و عقيم قالديغنى مكرّر مشاهداتله گورمش و كندى قوم و بيڭلر دوستلرى ايچنده، أڭ مهمّ فرصتده، سياسى جمعيت و جريانلرى ردّ ايتمش و قاريشمامش و ايمانِ تحقيقينڭ غايت قدسى و هيچ بر شيله زده‌لنمه‌سى جائز اولميان خدمتى بوزمق و أغراضِ سياسى ايله چوروتمگى أڭ بيوك بر جنايت تلقّى ايده‌رك شيطاندن قاچار گبى سياستدن قاچان و اون اوچ سنه‌دن بَرى "اَعُوذُ بِاللّٰهِ مِنَ الشَّيْطَانِ وَ السِّيَاسَةِ" يى كندينه دستور ايدن و حيله‌يى حيله‌سزلكده بولان، عصبى و بِلا پروا أسرارينى فاش ايدن، اون سنه إسپارطه ولايتنڭ حسّاس و جسّاس مأمورلرينه بويله تشكيلات سزديرمه‌ين بو آدمه، "بويله بر تشكيلات وار و سياسى بر دولاب چويرييورسڭز" ديينلره قارشى، يالڭز بن دگل، بلكه إسپارطه ولايتى و بتون بنى طانييانلر، بلكه بتون أهلِ عقل و وجدان، اونلرڭ إفترالرينى نفرتله قارشيلار و "غرضكارانه يالانلر ايله اونى إتهام ايدييورسڭز" دييه‌جكلر.

ثانيًا:

مسئله‌مز ايماندر. ايمان اخوّتيله بو مملكتده و إسپارطه‌نڭ يوزده طقسان طوقوز آدملرى ايله اخوّتمز وار. حالبوكه جمعيت ايسه، أكثر ايچنده أقلّيتڭ إتّفاقيدر. بر آدمه قارشى، طقسان طوقوز آدم جمعيت اولماز. مگر غايت إنصافسز بر دينسز، هركسى (حاشا) كنديسى گبى توهّم ايدوب، بو مبارك، ديندار ملّتى تحقير ايتمك نيّتيله بويله إشاعه ايدر.