محكمه‌ده جوابم

اون اوچ سنه مدّتله منزوى ياشايان بر آدم ألبته رسمى ايشلرى و قانونلرى بيلمز كه، اونلره رعايت ايتسين. اويله ايسه او رسمى سؤال و جواب يرينه، بو إفاده‌مى ديڭله‌مڭزى رجا ايدرم. چونكه إسپارطه‌ده اوچ يرده رسمى بر طرزده إفاده‌م آلينمش و بو اوزون يڭى إفاده‌م سزى شاشيرتميه‌جق. بلكه پك طوغرى اولارق حقّمده‌كى تحقيقاتڭزى تنوير ايده‌جك. و شيمدى ألڭزده اولان اوتوز كتابڭ تحقيقات و تفتيشندن سزى قورتاره‌جق. محكمه هيئتِ حاكمه‌سنڭ و داخليه وكيلنڭ و مجلسِ مبعوثان رياستنڭ نظرِ دقّتلرينه عرض ايديله‌جك عينِ حقيقت بر إستدعادر. و چوقلرڭ حياتِ أبديه‌لرينه تعلّق ايدر بر عرضحالدر.

أى محترم هيئتِ حاكمه!

بنى، درت بش مادّه ايله إتهام ايدوب توقيف ايتديلر.

برنجى مادّه:

إرتجاع فكريله دينى آلَت ايدوب، أمنيتِ عموميه‌يى إخلال ايده‌بيله‌جك بر تشبّث نيّتى وار اولديغى إخبار ايديلمش.

الجواب: أوّلا·

إمكانات باشقه‌در، وقوعات باشقه‌در. هر بر فرد، بر چوق فردلرى، آدملرى ئولديره‌بيلمه‌سى ممكندر. بو إمكانِ قتل جهتيله محكمه‌يه ويريليرلر مى؟ هر بر كبريت، بر خانه‌يى ياقمه‌سى ممكندر. بو يانغين إمكاناتيله، كبريتلر إمحا ايديلير مى؟

ثانيًا:

يوز بيڭ دفعه حاشا! إشتغال ايتديگمز علومِ ايمانيه، رضاىِ إلٰهيدن باشقه هيچ بر شيئه آلَت اولاماز. أوت گونش قمره پيك و تابع اولماديغى گبى، سعادتِ أبديه‌نڭ نورانى و قدسى آناختارى و حياتِ اُخرويه‌نڭ گونشى اولان ايمان دخى، حياتِ إجتماعيهِٔ دنيويهِٔ سياسيه‌نڭ آلَتى اولاماز. أوت بو كائناتڭ أڭ معظّم مسئله‌سى و شو خلقتِ عالمڭ أڭ بيوك معمّاسى اولان سرِّ ايماندن داها أهمّيتلى بر مسئلهِٔ كائنات يوقدر كه، بو مسئلهِٔ سرِّ ايمان اوڭا آلَت اولسون. حاشا!