الجواب:

مشركلر ايچنده، او زمانده صفِّ صحابه‌ده بولونان أكابرِ صحابه‌يه إستقبالده مقابل گله‌جك حضرتِ خالد گبى چوق ذاتلر بولونديغندن، شانلى و شرفلى اولان إستقباللرى نقطهِٔ نظرنده بتون بتون عزّتلرينى قيرمامق ايچون، حكمتِ إلٰهيه، حسناتِ إستقباليه‌لرينڭ بر مكافاتِ معجّله‌سى اولارق ماضيده اونلره ويرمش، بتون بتون عزّتلرينى قيرمامش. ديمك ماضيده‌كى صحابه‌لر، مستقبلده‌كى صحابه‌لره قارشى مغلوب اولمشلر. تا او مستقبل صحابه‌لر، برقِ سيوف قورقوسيله دگل، بلكه بارقهِٔ حقيقت شوقيله إسلاميته گيرسين و او شهامتِ فطريه‌لرى چوق ذلّت چكمه‌سين.

اوچنجيسى:

﴿لَا تَخَافُونَ﴾

قيديله إخبار ايدييور كه: "سزلر أمنيتِ مطلقه ايچنده كعبه‌يى طواف ايده‌جكسڭز." حالبوكه جزيرة العربده‌كى بدوى أقوام، چوغى دشمن اولمقله برابر، مكّه أطرافى و قُريش قبيله‌سى قسمِ أعظمى دشمن ايكن، ياقين بر زمانده هيچ خوف حسّ ايديلمزكن كعبه‌يى طواف ايده‌جكسڭز إخباريله جزيرة العربى إطاعت آلتنه و بتون قُريشى إسلاميت ايچنه و أمنيتِ تامّه وضع ايديلمه‌سنه، دلالت و إخبار ايدر. عينًا خبر ويرديگى گبى وقوعه گلمشدر.

دردنجيسى:

﴿هُوَ الَّذِى اَرْسَلَ رَسُولَهُ بِالْهُدٰى وَ دِينِ الْحَقِّ لِيُظْهِرَهُ عَلَى الدِّينِ كُلِّهِ﴾

كمالِ قطعيتله إخبار ايدييور كه: "رسولِ أكرم عليه الصلاة والسلامڭ گتيرديگى دين، عموم دينلره غلبه چالاجق." حالبوكه او زمانده يوزر ميليون تبعه‌سى بولونان نصارا و يهودى و مجوسى دينلرى و روما، چين و ايران حكومتى گبى يوزر ميليون تبعه‌سى بولونان جهانگير دولتلرڭ أديانِ رسميلرى ايكن، كندى كوچك قبيله‌سنه قارشى تام غلبه ايده‌مه‌ين بر وضعيتده بولونان محمّدِ عربى عليه الصلاة والسلامڭ گتيرديگى دين، عموم دينلره غالب و عموم دولتلره مظفّر اولاجغنى إخبار ايدييور. هم غايت وضوح و قطعيتله إخبار ايدييور. إستقبال، او خبرِ غيبىيى، بحرِ محيطِ شرقيدن بحرِ محيطِ غربىيه قدر إسلام قلنجنڭ اوزاماسيله تصديق ايتمشدر.