حضرتِ علىيه (رض) قارشى شيعهِٔ ولايتڭ إفراطكارانه محبّتلرى و طريقت جهتندن گلن تفضيللرى، كنديلرينى شيعهِٔ خلافت درجه‌سنده مسئول ايتمز. چونكه أهلِ ولايت مسلك إعتباريله، محبّت ايله مرشدلرينه باقارلر. محبّتڭ شأنى إفراطدر. محبوبنى مقامندن فضله گورمك آرزو ايدييور و اويله ده گورويور. محبّتڭ طاشقينلقلرنده أهلِ حال معذور اولابيليرلر. فقط اونلرڭ محبّتدن گلن تفضيلى، خلفاءِ راشدينڭ ذمّنه و عداوتنه گيتمه‌مك شرطيله و اصولِ إسلاميه‌نڭ خارجنه چيقمه‌مق قيديله معذور اولابيليرلر. شيعهِٔ خلافت ايسه· أغراضِ سياست، ايچنه گيرديگى ايچون، غرضدن، تجاوزدن قورتولامييورلر، إعتذار حقّنى غيب ايدييورلر. حتّى

﴿لَا لِحُبِّ عَلِىٍّ بَلْ لِبُغْضِ عُمَرَ﴾

جمله‌سنه ماصدق اولارق حضرتِ عُمَرڭ (رض) أليله ايران ملّيتى جريحه آلديغى ايچون، إنتقاملرينى حبِّ على صورتنده گوستردكلرى گبى، عَمر ابن العاصڭ حضرتِ علىيه (رض) قارشى خروجى و عُمَر ابن سعدڭ حضرتِ حسينه (رض) قارشى فجيع محاربه‌سى، عُمَر إسمنه قارشى شدّتلى بر غيظ و عداوتى شيعه‌لره ويرمش.

أهلِ سنّت و جماعته قارشى شيعهِٔ ولايتڭ حقّى يوقدر كه، أهلِ سنّتى تنقيد ايتسين. چونكه أهلِ سنّت، حضرتِ علىيى (رض) تنقيص ايتمدكلرى گبى، جدّى سَورلر. فقط حديثجه تهلكه‌لى صاييلان إفراطِ محبّتدن چكينيورلر. حديثجه حضرتِ علىنڭ (رض) شيعه‌سى حقّنده‌كى ثناىِ نبوى، أهلِ سنّته عائددر. چونكه إستقامتلى محبّتله حضرتِ علىنڭ (رض) شيعه‌لرى، أهلِ حق اولان أهلِ سنّت و جماعتدر. حضرتِ عيسى عليه السلام حقّنده‌كى إفراطِ محبّت، نصارا ايچون تهلكه‌لى اولديغى گبى· حضرتِ على (رض) حقّنده ده او طرزده إفراطِ محبّت، حديثِ صحيحده تهلكه‌لى اولديغى تصريح ايديلمش.