ايشته أهلِ حقّڭ بو حقسز إختلاف مرضنڭ مرهمى و علاجى:

﴿وَلَا تَنَازَعُوا فَتَفْشَلُوا وَتَذْهَبَ رِيحُكُمْ﴾

آيتنده‌كى شدّتلى نهىِ إلٰهى،

﴿وَتَعَاوَنُوا عَلَى الْبِرِّ وَالتَّقْوٰى﴾

آيتنده حياتِ إجتماعيه‌جه غايت حكمتلى أمرِ إلٰهىيى دستورِ حركت ايتمك و إختلافڭ إسلاميته نه درجه ضررلى اولديغنى و أهلِ ضلالتڭ أهلِ حقّه غلبه‌سنى نه درجه تسهيل ايتديگنى دوشونوب، كمالِ ضعف و عجز ايله، او أهلِ حقّڭ قافله‌سنه فداكارانه، صميمانه إلتحاق ايتمكدر· شخصيتنى اونوتمقله ريا و تصنّعدن قورتولوب، إخلاصى ألده ايتمكدر.

آلتنجى سبب:

أهلِ حقّڭ إختلافى نامردلكلرندن، همّتسزلكلرندن، حميتسزلكلرندن اولماديغى گبى· غفلتلى أهلِ دنيانڭ و أهلِ ضلالتڭ، حياتِ دنيويه‌يه عائد ايشلرده صميمانه إتّفاقلرى دخى مردلكدن، حميتدن، همّتدن دگلدر. بلكه، أهلِ حقّڭ أكثريتله آخرته عائد اولان فائده‌لرى دوشونمكله، او أهمّيتلى و كثرتلى مسئله‌لره حميتى، همّتى، مردلگى إنقسام ايدر. حقيقى سرمايه اولان وقتنى بر مسئله‌يه صرف ايتمديگى ايچون، مسلكداشلريله إتّفاقى محكملشمييور. چونكه مسئله‌لر چوق، دائره دخى گنيشدر. غفلتلى أهلِ دنيا ايسه، يالڭز حياتِ دنيويه‌يى دوشوندكلرندن، بتون حسّياتيله و روح و قلبيله شدّتلى بر صورتده حياتِ دنيويه‌يه عائد مسئله‌لره صاريلير. و او مسئله‌ده اوڭا يارديم ايدنه قوّتلى ياپيشير. و حقيقت نقطهِٔ نظرنده بش پاره‌يه دگمه‌ين و أهلِ حق اوڭا اون پاره قيمت ويرمه‌ين مسئله‌لره، ديوانه اولمش ألماسجى بر يهودينڭ بش پاره‌لق جام پارچه‌سنه بش ليرا فيآت ويرديگى گبى، بش يوز ليرا قيمتنده‌كى وقتنى او مسئله‌يه حصر ايدر. ألبته بو قدر فيآت ويروب و شدّتلى حسّيات ايله صاريلمق، باطل يولنده دخى اولسه صميمى بر إخلاص اولديغندن، او مسئله‌ده موفّق اولور و أهلِ حقّه غلبه ايدر. بو غلبه نتيجه‌سنده أهلِ حق ذلّته و محكوميته و تصنّعه و ريايه دوشوب، إخلاصى غائب ايدر. او نامرد، همّتسز، حميتسز بر قسم أهلِ دنيايه دالقاووقلق ايتمگه مجبور اولور.