بشنجى نكته:

اوچ مسئله‌در.

برنجى مسئله:

أصل مصيبت و مضر مصيبت، دينه گلن مصيبتدر. مصيبتِ دينيه‌دن هر وقت درگاهِ إلٰهيه‌يه إلتجا ايدوب فرياد ايتمك گركدر. فقط دينى اولميان مصيبتلر، حقيقت نقطه‌سنده مصيبت دگلدرلر. بر قسمى إخطارِ رحمانيدر. ناصلكه چوبان، غيرڭ تارلاسنه تجاوز ايدن قويونلرينه طاش آتوب، اونلر او طاشدن حسّ ايدرلر كه: ضررلى ايشدن قورتارمق ايچون بر إخطاردر، ممنونانه دونرلر. اويله ده چوق ظاهرى مصيبتلر وار كه· إلٰهى برر إخطار، برر ايقاظدر و بر قسمى كفّارة الذنوبدر و بر قسمى غفلتى طاغيتوب، بشرى اولان عجزينى و ضعفنى بيلديره‌رك بر نوع حضور ويرمكدر. مصيبتڭ خسته‌لق اولان نوعى، سابقًا گچديگى گبى او قسم، مصيبت دگل، بلكه بر إلتفاتِ ربّانيدر، بر تطهيردر. روايتده واردر كه: "ايرمش بر آغاجى سيلكمكله ناصل ميوه‌لرى دوشويور، صيتمه‌نڭ تيتره‌مه‌سندن گناهلر اويله دوكولويور."

حضرتِ أيوب عليه السلام مناجاتنده إستراحتِ نفسى ايچون دعا ايتمه‌مش، بلكه ذكرِ لسانى و تفكّرِ قلبىيه مانع اولديغى زمان عبوديت ايچون شفا طلب أيله‌مش. بز، او مناجات ايله (برنجى مقصديمز) گناهلردن گلن معنوى روحى ياره‌لريمزڭ شفاسنى نيّت ايتملىيز. مادّى خسته‌لقلر ايچون عبوديته مانع اولديغى زمان إلتجا ايده‌بيليرز. فقط معترضانه، مشتكيانه بر صورتده دگل، بلكه متذلّلانه و إستمدادكارانه إلتجا ايديلمه‌لى. مادام اونڭ ربوبيتنه راضىيز، او ربوبيتى نقطه‌سنده ويرديگى شيئه رضا لازم. قضا و قدرينه إعتراضى إشمام ايدر بر طرزده "آه! اوف!" ايدوب شكوا ايتمك· بر نوع قدرى تنقيددر، رحيميتنى إتهامدر. قدرى تنقيد ايدن، باشنى ئورسه وورور قيرار. رحمتى إتهام ايدن، رحمتدن محروم قالير. قيريلمش أل ايله إنتقام آلمق ايچون او ألى إستعمال ايتمك، ناصل قيريلماسنى تزييد ايدييور. اويله ده: مصيبته گرفتار اولان آدم، إعتراضكارانه شكوا و مراقله اونى قارشيلامق، مصيبتى ايكيلشديرييور.