يگرمى طوقوزنجى سوزده روح بحثنده مدارِ سؤالڭز اولان او حقيقت ايضاح ايديلمشدر. أوت روح، ماهيتى إعتباريله بر قانونِ أمريدر. فقط وجودِ خارجى گيديرلمش بر ناموسِ ذىحياتدر و وجودِ خارجى صاحبى بر قانوندر. حضرتِ محيى الدين يالڭز ماهيتى نقطه‌سنده دوشونمشدر.

وحدت الوجود مشربنجه أشيانڭ وجودينى خيال گورويور. او ذات خارقه كشفياتيله و مشاهداتيله و مهمّ بر مشرب صاحبى و مستقل بر مسلك إختيار ايتديگندن بِالمجبوريه ضعيف تأويلاتيله تكلّفلى بر صورتده بعض آياتى مشربنه، مشهوداتنه تطبيق ايدييور. آياتڭ صراحتنى اينجيتييور. سائر رساله‌لرده جادّهِٔ مستقيمهِٔ قرآنيه و منهاجِ قويمِ أهلِ سنّت بيان ايديلمشدر. او ذاتِ قدسينڭ كندينه مخصوص بر مقامى وار، هم مقبوليندندر. فقط ميزانسز كشفياتنده حدودلرى چيگنه‌مش و جمهورِ محقّقينه چوق مسئله‌لرده مخالفت ايتمش. ايشته بو سرّ ايچوندر كه، او قدر يوكسك و خارقه بر قطب، بر فريدِ دوران اولديغى حالده· كندينه مخصوص طريقتى غايت قيصه‌جق صدر الدينِ قنوىيه منحصر قالييور گبيدر. و آثارندن إستقامتكارانه إستفاده نادر اولويور. حتّى چوق محقّقينِ أصفيا او قيمتدار آثارينى مطالعه ايتمگه رواج گوسترمييورلر. حتّى بعضلرى منع ايدييورلر.

حضرتِ محيى الدينڭ مشربيله أهلِ تحقيقڭ مشربنڭ مابيْننده‌كى أساسلى فرقى و اونلرڭ مأخذلرينى گوسترمك، چوق اوزون تدقيقاته و چوق يوكسك و گنيش نظرلره محتاجدر. أوت، فرق او قدر دقيق و درين و مأخذ او قدر يوكسك و گنيشدر كه· حضرتِ محيى الدين خطاسندن مؤاخذه ايديلمه‌مش، مقبول اولارق قالمش. يوقسه أگر علمًا، فكرًا و كشفًا او فرق و او مأخذ گورونسه ايدى، اونڭ ايچون غايت بيوك بر سقوط و آغير بر خطا اولوردى.