﴿بِاسْمِهِ سُبْحَانَهُ ٭ وَ اِنْ مِنْ شَيْءٍ اِلَّا يُسَبِّحُ بِحَمْدِهِ﴾

﴿اَلسَّلَامُ عَلَيْكُمْ وَ رَحْمَةُ اللّٰهِ وَ بَرَكَاتُهُ اَبَدًا دَائِمًا﴾

عزيز، صدّيق قارداشلرم،

مادام رسالهِٔ نور، ماكينه ايله تعمّم ايتمگه باشلامش و مادام فلسفه و حكمتِ جديده‌يى اوقويان مكتبليلر و معلّملر چوقلقله رسالهِٔ نوره ياپيشييورلر. ألبته بر حقيقت بيان ايتمك لازم گلييور. شويله كه:

رسالهِٔ نورڭ شدّتله طوقات وورديغى و هجوم ايتديگى فلسفه ايسه مطلق دگلدر، بلكه مضر قسمنه‌در. چونكه فلسفه‌نڭ حياتِ إجتماعيهِٔ بشريه‌يه و أخلاق و كمالاتِ إنسانيه‌يه و صنعتڭ ترقّياتنه خدمت ايدن فلسفه و حكمت قسمى ايسه، قرآن ايله باريشيقدر. بلكه قرآنڭ حكمتنه خادمدر، معارضه ايده‌مز. بو قسمه رسالهِٔ نور ايليشمييور.

ايكنجى قسم فلسفه ايسه، ضلالته و إلحاده و طبيعت باتاقلغنه دوشورمگه وسيله اولديغى گبى، سفاهت و لهويات ايله غفلت و ضلالتى نتيجه ويرديگندن و سحر گبى خارقه‌لريله قرآنڭ معجزه‌كار حقيقتلريله معارضه ايتديگى ايچون، رسالهِٔ نور أكثر أجزالرنده ميزانلرله و قوّتلى و برهانلى موازنه‌لرله فلسفه‌نڭ يولدن چيقمش بو قسمنه ايليشييور، طوقاتلايور· مستقيم، منفعتدار فلسفه‌يه ايليشمييور. اونڭ ايچون مكتبليلر، رسالهِٔ نوره إعتراضسز، چكينميه‌رك گيرييورلر و گيرمليدرلر.