ايشته، سوفسطائينڭ أڭ أبلهلرى دخى، بويله بر مسلكدن اوتانييور.

اوچنجى محال:

﴿اَلْوَاحِدُ لَا يَصْدُرُ اِلَّا عَنِ الْوَاحِدِ﴾

قاعدهِٔ مقرّره‌سيله: "بر موجودڭ وحدتى وارسه، ألبته بر واحددن، بر ألدن صدور ايده‌بيلير." خصوصًا او موجود، غايت مكمّل بر إنتظام و حسّاس بر ميزان ايچنده و جامع بر حياته مظهر ايسه، بِالبداهه سببِ إختلاف و كشماكش اولان متعدّد أللردن چيقمديغنى· بلكه غايت قدير، حكيم اولان بر تك ألدن چيقديغنى گوسترديگى حالده· حدسز و جامد و جاهل، متجاوز، شعورسز، قارمه‌قاريشيقلق ايچنده، كور، صاغير أسبابِ طبيعيه‌نڭ قارمه‌قاريشيق أللرينه، حدسز إمكانات يوللرى ايچنده و إجتماع و إختلاط ايله، او أسبابڭ كورلگى، صاغيرلغى زياده‌لشديگى حالده· او منتظم و موزون و واحد بر موجودى اونلره إسناد ايتمك، يوز محالى بردن قبول ايتمك گبى عقلدن اوزاقدر. هايدى بو محالدن قطعِ نظر، أسبابِ مادّيه‌نڭ ألبته تأثيرلرى، مباشرتله و تماسله اولور. حالبوكه او أسبابِ طبيعيه‌نڭ تماسلرى، ذىحيات موجودلرڭ ظاهرلريله‌در. حالبوكه گورويورز كه· او أسبابِ مادّيه‌نڭ أللرى يتيشمديگى و تماس ايده‌مدكلرى او ذىحياتڭ باطنى، اون دفعه ظاهرندن داها منتظم، داها لطيف، صنعتجه داها مكمّلدر. أسبابِ مادّيه‌نڭ أللرى و آلَتلريله هيچ بر جهتله يرلشه‌مدكلرى، بلكه تام ظاهرينه ده تماس ايده‌مدكلرى كوچوجك ذىحيات، كوچوجك حيوانجقلر، أڭ بيوك مخلوقلردن داها زياده صنعتجه عجيب، خلقتجه بديع بر صورتده اولدقلرى حالده، او جامد، جاهل، قابا، اوزاق، بيوك و بربرينه ضد اولان صاغير، كور أسبابه إسناد ايتمك، يوز درجه كور، بيڭ درجه صاغير اولمقله اولور!..