بديع الزمان

بَرْغْسُونْ "أخلاقله دينڭ ايكى قايناغى" آدلى صوڭ كتابلرندن بريسنده· بِالخاصّه أخلاقڭ، بر إنسان جمعيتنده آلچالمش وقعه دركه‌سندن علوى مفكوره سويه‌سنه، آنجق ديندار و تميز شخصيتلر سايه‌سنده يوكسله‌بيله‌جگنى قيد ايدر.

بو گوروش، إنسانلق و مسلمانلق تاريخنده صاييسز ئورنكلرله هر زمان تحقّق أيله‌مشدر. ذاتًا پسيقولوژى علمنه طايانان تربيه صنعتى، (عنعنه‌وى يوللرنده) بو عمده‌يه طوتونديغى و يڭى بر إستقامت ويريله‌جك نسللرى بو قبيل ئورنك إنسانلرى تقليده سَوق ايتديگى نسبتده، بزدن أوّلكى دورلرده، بزدن چوق مسعود إنسانلر يتيشديرمشدر.

بديع الزمان، هانگى جمعيتده و هانگى دورده ياشارسه ياشاسين، ايشته بو إشارت ايتديگمز ئورنك إنسان وصفلرينى محافظه ايدن تميز و مستثنا شخصيتلردن بريسيدر. تورك ملّتنى محو ايتمك ايچون جاسوس أللرله پرده آرقه‌سنده يتيشديريلمش و تورك ملّتنى يالانله، دولانله هر ثانيه آلداتمغى كندينه بر گچينمه صنعتى ايدينمش بر سورى وطن خائنى و ملّت دشمنى مخلوقلر، بو تميز شخصيتڭ ييللردن بَرى حياتنى جَنْدَرَه‌يه صوقمشدر. صورارز: (فقط كيمه صوراجغز؟ بو صورغودن ده نه اوماجغز؟) بتون تاريخمزده، هر فرصتده، أڭ قورقونج و امانسز دشمنلغنى إثبات ايدن فنار پاطريقلرى محتشم سرايلرنده سلطنت سورركن· بو عزيز طوپراغڭ عصرلردن بَرى طاپوسنى (أڭ آز بيڭ سنه‌لك بر ملكيت حقّيله) أتنده و قلبنده طاشييان بديع الزمان، بو فساد اوجاغنڭ بر قپوجيسى قدر ده مى ياشامق حقّندن محروم قالسين؟

هانگيمز ياپراقلرى آراسنده فكرى و روحى سياحتلره قالقديغمز كتابلريمزڭ، آنسزين مقدّس بيلينن مسكنمزه تجاوز ايديله‌رك، اوطه‌مزده باصقينه اوغرايه‌رق أللريمزدن قاپيلوب غصب ايديلمه‌سنه تحمّل ايده‌بيليرز؟ بويله بر حركت (گويا تقليد ايديلن) چاغداش مدنى جمعيتلردن أڭ گرى قالان إسپانيه‌ده ده وقوع بولاماز. هله وقوعندن صوڭره نامتناهى أصلا تكرّر ايده‌مز.