تحليللر

اوزون بر آيريلقدن صوڭره،

بلكه يگرمى يدى، يگرمى سكز سنه اولدى استادى گورميه‌لى. اونى گورمك، مبارك سيماسنى طويه طويه سير ايتمك ايچون هر زمان گيدوب زيارت ايتمك ايستديگم حالده، مشغوليتدن بر درلو وقت بولامدم. فقط او قلبلرده ياشاديغى ايچون، معنوى وارلغى ايله دائما برابردك. بو، گوڭللرده‌كى إشتياقى بر درجه‌يه قدر تطمين ايتمز ميدى؟ كنديسنى گوروب قوجاقلاشديغمز زمان، اونڭ نورانى سيماسنڭ ويرديگى ذوق، مادّى حسرتڭ ده نه قدر بيوك اولديغنى گوستردى.

استادله طانيشمامز قرق سنه‌يى گچدى. او زمانلر همان هر گون إداره‌خانه‌يه گلير· عاكفلر، ناعملر، فريدلر، إزميرليلرله برلكده ساعتلرجه طاتلى طاتلى مصاحبه‌لرده بولونوردق. استاد، كندينه مخصوص شيوه‌سيله يوكسك علمى مسئله‌لردن قونوشور· اونڭ قونوشماسنده‌كى جلادت و شهامت، بزى ده هيجانلانديرردى. خارق العاده فطرى بر ذكا، إلٰهى بر موهبه. أڭ مُعْضِل مسئله‌لرده، ذكاسنڭ قدرت و عظمتى كنديسنى گوسترر. دائما ايشله‌ين و دوشونن بر قفا. نقللرله پك مشغول دگل. اونڭ رهبرى يالڭز قرآن. بتون فيض و ذكا قايناغى بو. بتون او لمعه‌لر، طوغريدن طوغرىيه بو قايناقدن نبعان ايدييور. بر مجتهد، بر إمام قدر رأى صاحبى. قلبى، بر صحابى قدر ايمانله طولو. روحنده، عُمَرڭ شهامتى وار. يگرمنجى عصرده دورِ سعادتى نفسنده ياشاتان بر مؤمن، بتون هدفى ايمان و قرآن.

إسلامڭ غايت الغايه‌سى اولان "توحيد" و "اللّٰهه ايمان" أساسى، اونڭ و رسالهِٔ نورڭ أڭ بيوك عمده‌سيدر. دورِ سعادتده، مسلمانلغڭ ايلك قورولوش زمانلرنده اولسيدى، حضرتِ پيغمبر، كعبه‌ده‌كى پوتلرڭ پارچه‌لانمسى وظيفه‌سنى اوڭا ويرردى. شركه و پوتپرستلگه او درجه دشمندر.