﴿بِاسْمِهِ سُبْحَانَهُ﴾

....

بعض أماره‌لرله بيلدم كه، گيزلى دشمنلريمز نورلرڭ قيمتنى دوشورمك فكريله سياست معناسنى خاطرلاتان مهديلك دعواسنى توهّم ايله گويا نورلر بوڭا بر آلَتدر دييه چوق أصلسز بهانه‌لرى آراشديرييورلر. بلكه بنم شخصمه قارشى بو إشكنجه‌لر، بو أوهاملرندن ايلرى گلييور. بن او گيزلى ظالم دشمنلره و اونلرى عليهمزده ديڭله‌ينلره ديرم: حاشا! ثمّ حاشا!.. هيچ بر وقت بويله حدّمدن تجاوز ايدوب ايمان حقيقتلرينى شخصيتمه بر مقامِ شان و شرف قزانديرمغه آلَت ايتمديگمى بو يتمش بش، خصوصًا اوتوز سنه‌لك حياتم و يوز اوتوز نور رساله‌لرى و بنم ايله تام آرقداشلق ايدن بيڭلر ذاتلر شهادت ايدرلر.

أوت نور شاكردلرى بيلييورلر و محكمه‌لرده حجّتلرينى گوسترمشم كه· شخصمه دگل بر مقامِ شان و شرف و شهرت ويرمك و اُخروى و معنوى بر مرتبه قزانديرمق، بلكه بتون قناعت و قوّتمله أهلِ ايمانه بر خدمتِ ايمانيه ياپمق ايچون، دگل يالڭز دنيا حياتمى و فانى مقاماتنى، بلكه (لزوم اولسه) آخرت حياتمى و هركسڭ آراديغى اُخروى باقى مرتبه‌لرينى فدا ايتمگى· حتّى جهنّمدن بعض بيچاره‌لرى قورتارمغه وسيله اولمق ايچون (لزوم اولسه) جنّتى بيراقوب جهنّمه گيرمگى قبول ايتديگمى حقيقى قارداشلرم بيلديگى گبى، محكمه‌لرده دخى بر جهتده إثبات ايتديگم حالده، بنى بو إتهامله نور و ايمان خدمتمه بر إخلاصسزلق إسناد ايتمك و نورلرڭ قيمتنى تنزيل ايتمكدر.