آلتنجيسى:

نورڭ شاكردلرندن بعضيلرينڭ نورلردن فوق العاده ايمان حجّتلرينى و صارصيلماز، عين اليقين علومِ ايمانيه‌يى گوروب إستفاده ايتدكلرندن، بو بيچاره ترجماننه بر نوع تشويق و تبريك و تقدير و تشكّر نوعنده، زياده حسنِ ظن ايله مفرطانه مدح ايتمه‌لرى ايله بنى صوچلى گوسترنه ديرم: بن عاجز، ضعيف، غربتده، منفى، ياريم اُمّى، عليهمده پروپاغنده ايله خلقى بندن اوركوتمك حالتى ايچنده قرآنڭ علاجلرندن و ايمانى و قدسى حقيقتلرندن دردلريمه تام درمان اولارق كنديمه بولديغم زمان، بو ملّته و بو وطن أولادلرينه دخى تام بر علاج اولاجغنه قناعت گتيرديگم ايچون او قيمتدار حقيقتلرى قلمه آلدم. خطّم پك نقصان اولماسندن يارديمجيلره پك چوق محتاج ايكن، عنايتِ إلٰهيه بڭا صادق، خاص، متين يارديمجيلرى ويردى.

ألبته بن اونلرڭ حسنِ ظنلرينى و صميمانه مدحلرينى بتون بتون ردّ ايتمك و خاطرلرينى تكدير ايله قيرمق، او خزينهِٔ قرآنيه‌دن آلينان نورلره بر إهانت و عداوت حكمنه گچر. و او ألماس قلملى و قهرمان قلبلى معاونلرى قاچيره‌جق دييه اونلرڭ عادى، مفلس شخصمه قارشى مدح و ثنالرينى، أصل مال صاحبى و بر معنوى معجزهِٔ قرآنيه اولان رسالهِٔ نوره و خاص شاكردلرينڭ شخصيتِ معنويه‌سنه چويرييوردم. بنم حدّمدن يوز درجه زياده حصّه ويرييورسڭز دييه، بر جهتده خاطرلرينى قيرييوردم. عجبا هيچ بر قانون، مستنكف و راضى اولميان بر آدمى باشقه‌لرڭ اونى مدح ايتمه‌سيله صوچلى ياپار مى كه، قانون نامنه حركت ايدن رسمى مأمور بنى صوچلى ياپييور؟