صوڭ سوزم

هيئتِ حاكمه‌يه بيان ايدييورم كه:

هم إدّعانامه‌دن، هم اوزون تجريدلرمدن آڭلادم كه، بو مسئله‌ده أڭ زياده شخصم نظره آلينييور و شخصمى چوروتمك مصلحت گورولمش. گويا شخصيتمڭ إداره‌يه، آسايشه، وطنه ضررى وار. و بن ده دين پرده‌سى آلتنده دنيوى مقصدلر گودويورميشم، بر نوع سياست پشنده قوشويورميشم. بوڭا قارشى، سزه بونى قطعيتله بيان ايدييورم:

بو أوهام يوزندن، بنم شخصيتمى چوروتمك صورتنده رسالهِٔ نوره و بو وطنه و بو ملّته فداكار و قيمتدار اولان شاكردلرينى اينجيتمه‌ييڭز. يوقسه بو وطنه و بو ملّته معنوى بيوك بر ضرر، بلكه بر تهلكه‌يه وسيله اولور. بونى ده سزه قطعيًا بيان ايدييورم: شخصمه تحقير و إهانت و چوروتمك و إشكنجه، جزا گبى نه گلسه· (رسالهِٔ نوره و شاكردلرينه بنم يوزمدن ضرر گلمه‌مك شرطيله، شيمديكى مسلگم إعتباريله) قبوله قرار ويرمشم. بونده ده آخرتم ايچون بر ثواب وار. و نفسِ أمّاره‌نڭ شرّندن قورتولمامه بر وسيله‌در دييه بر جهتده آغلاركن ممنون اولويورم. أگر بو بيچاره معصوملر بنمله برابر بو مسئله‌ده حپسه گيرمسه ايديلر، محكمه‌ڭزده پك شدّتلى قونوشه‌جقدم. سز ده گورديڭز كه، إدّعانامه‌يى يازان، بيڭ دره‌دن صو طوپلامق گبى يگرمى اوتوز سنه‌لك حياتمده (محرم و غيرِ محرم بتون كتاب و مكتوبلرمدن) جربزه‌سيله و قسمًا ياڭليش معنا ويرمسيله گويا عموم اونلر بو سنه يازيلمش، هيچ محكمه‌لرى گورمه‌مش، عفو قانونلرينه و مرورِ زمانه اوغرامامش گبى اونڭ ايله بنم شخصمى چوروتمك ايسته‌يور. بن كندم، شخصمڭ چوروك اولديغنى يوز دفعه سويله‌ديگم و عليهمده اولانلر هر وسيله ايله ينه شخصمى چوروتدكلرى حالده، أهلِ سياستى أوهاملانديره‌جق درجه‌ده توجّهِ عامّه‌يه قارشى فائده ويرمديگنڭ سببى: ايمانڭ قوّتلنمه‌سى ايچون بو زمانده و بو زمينده غايت شدّتلى بر إحتياجِ قطعى ايله بعض شخصلر لازمدر كه، حقيقتى هيچ بر شيئه آلَت ايتمه‌سين. نفسنه هيچ بر حصّه ويرمه‌سين. تا كه، ايمانه دائر درسندن إستفاده ايديلسين، قناعتِ قطعيه گلسين.