بديع الزمان سعيد نورسىنڭ إعلانِ حرّيتڭ اوچنجى گوننده إرتجالاً سويله‌ديگى و صوڭره سلانيكده حرّيت ميداننده تكرار ايتديگى و او زمانڭ غزته‌لرينڭ نشر ايتدكلرى نطقنڭ صورتيدر.

حرّيته خطاب

أى حرّيتِ شرعى! اويله مدهش و فقط گوزل و مژده‌لى بر صدا ايله چاغيرييورسڭ كه، بنم گبى بر بدوىيى طبقاتِ غفلت آلتنده ياتمشكن اويانديرييورسڭ. سن اولماسه‌يدڭ، بن و عموم ملّت، زندانِ أسارتده قالاجقدق. سنى عمرِ أبدى ايله تبشير ايدييورم. أگر عين الحياتِ شريعتى منبعِ حيات ياپسه‌ڭ و او جنّتده نشو و نما بولسه‌ڭ، بو ملّتِ مظلومه‌نڭ ده أسكى زمانه نسبةً بيڭ درجه ترقّى ايده‌جگنى مژده ويرييورم. أگر حقّيله سنى رهبر ايتسه و أغراضِ شخصى و فكرِ إنتقام ايله سزى لكه‌دار ايتمزسه...

يا ربّ! نه سعادتلى بر قيامت و نه گوزل بر حشر كه،

﴿وَ الْبَعْثُ بَعْدَ الْمَوْتِ﴾

حقيقتنڭ كوچك بر مثالنى بو زمان بزه تصوير ايدييور. شويله كه:

آسيانڭ و روم ايلينڭ كوشه‌لرنده مدفون اولان مدنيتِ قديمه حياته باشلامش· منفعتنى مضرّتِ عموميه‌ده آرايان و إستبدادى آرزو ايدنلر

﴿يَا لَيْتَنِى كُنْتُ تُرَابًا﴾

ديمگه باشلاديلر. يڭى حكومتِ مشروطه‌مز معجزه گبى طوغديغى ايچون إن شاء اللّٰه بر سنه‌يه قدر،

﴿نُكَلِّمُ مَنْ كَانَ فِى الْمَهْدِ صَبِيًّا﴾

سرّينه مظهر اولاجغز. متوكّلانه، صبورانه طوتديغمز اوتوز سنه رمضانِ سكوتڭ ثوابيدر كه، عذابسز جنّتِ ترقّى و مدنيت قپولرينى بزه آچمشدر. حاكميتِ ملّيه‌نڭ براعتِ إستحلالى اولان قانونِ شرعى، خازنِ جنّت گبى بزى دخوله دعوت ايدييور.