أوت بز بر جمعيتز و اويله بر جمعيتمز وار كه· هر بر عصرده اوچ يوز أللى ميليون داخل منسوبلرى وار. و هر گون بش دفعه نمازله او مقدّس جمعيتڭ پرنسبلرينه كمالِ حرمتله علاقه‌لرينى و خدمتلرينى گوسترييورلر.

﴿اِنَّمَا الْمُؤْمِنُونَ اِخْوَةٌ﴾

قدسى پروغراميله بربرينڭ يارديمنه (دعالريله و معنوى قزانجلريله) قوشويورلر. ايشته بز بو مقدّس و معظّم جمعيتڭ أفرادندنز. و خصوصى وظيفه‌مز ده، قرآنڭ ايمانى حقيقتلرينى تحقيقى بر صورتده أهلِ ايمانه بيلديروب، اونلرى و كنديمزى إعدامِ أبديدن و دائمى و برزخى حپسِ منفرددن قورتارمقدر. سائر دنيوى و سياسى و أنتريقه‌لى جمعيت و قوميته‌لرله و بزم مدارِ إتهاممز اولان جمعيتجيلك گبى أصلسز و معناسز گيزلى جمعيتله هيچ بر مناسبتمز يوقدر و تنزّل ايتمييورز. و درت محكمه اينجه‌دن اينجه‌يه تدقيقدن صوڭره او جهتده بزه برائت ويرمش.

أوت نور شاكردلرى بيلييورلر و محكمه‌لرده حجّتلرينى گوسترمشم كه· شخصمه دگل بر مقامِ شان و شرف و شهرت ويرمك و اُخروى و معنوى بر مرتبه قزانديرمق، بلكه بتون قناعت و قوّتمله أهلِ ايمانه بر خدمتِ ايمانيه ياپمق ايچون، دگل يالڭز دنيا حياتمى و فانى مقاماتمى، بلكه (لزوم اولسه) آخرت حياتمى و هركسڭ آراديغى اُخروى و باقى مرتبه‌لرى فدا ايتمه‌يى· حتّى جهنّمدن بعض بيچاره أهلِ ايمانلرى قورتارمغه وسيله اولمق ايچون (لزوم اولسه) جنّتى بيراقوب جهنّمه گيرمگى قبول ايتديگمى حقيقى قارداشلرم بيلدكلرى گبى، محكمه‌لرده دخى بر جهتده إثبات ايتديگم حالده، بنى بو إتهامله نور و ايمان خدمتمه بر إخلاصسزلق إسناد ايتمكله و نورلرڭ قيمتلرينى تنزيل ايتمكله ملّتى اونڭ بيوك حقيقتلرندن محروم ايتمكدر.