بو شعشعه‌لى بهارڭ چيچكلرينى تماشا ايتمك ايچون آرابه ايله بر ايكى ساعت گزييورم. هيچ حياتمده گورمه‌ديگم بر طرزده بتون چيچكلى اوتلر، عادتڭ فوقنده بر طرزده بيومش، چيچكلر آچمش، تبسّمكارانه تسبيحات ايدوب، لسانِ حال ايله صانعِ ذو الجلاللرينڭ صنعتنى تقدير و آلقيشلايورلر گبى حقّ اليقين حسّ ايتديگمدن· حياتِ دنيويه‌يه مشتاق حسّياتم و غافل و تحمّلسز نفسم بو حالدن إستفاده ايده‌رك، دنيادن نفرت و خسته‌لقلى و صيقنتيلى حياتدن اوصانمق و برزخه گيتمگه و اوراده‌كى يوزده طقسان دوستلرينى گورمگه إشتياق جهتنده قرار ويرن قلبمه و فانيده باقى ذوق آرايان نفسمه إعتراض گلدى. بردن حسّياته ده، طمارلره ده سرايت ايدن ايمان نورى او إعتراضه قارشى گوستردى كه: مادام طوپراق بو قدر جمال و رحمت و حيات و زينتلره مادّى جهتنده مظهر اولماسندن حدسز بر رحمتڭ پرده‌سيدر و ايچنه گيرن هيچ بر شى باشىبوش قالمييور.. ألبته بتون بو ظاهرى و مادّى زينتلرڭ و گوزللكلرڭ و حُسن و جمال و رحمت و حياتڭ معنوى مركزلرينڭ و بر قسم تزگاهلرينڭ فعّال بر نوعى، طوپراق پرده‌سنڭ آلتنده و آرقه‌سنده‌در. ألبته بو حمايتلى آننه‌مز اولان طوپراق آلتنه گيرمك و قوجاغنه صيغينمق و او حقيقى و دائمى و معنوى چيچكلرى سير ايتمك، داها زياده سَويلير و إشتياقه لايقدر.. دييه او كور حسّياتڭ و دنياپرست نفسڭ إعتراضنى تماميله إزاله و دفع ايتدى.

﴿اَلْحَمْدُ للّٰه عَلٰى نُورِ اْلاِيمَانِ مِنْ كُلِّ وَجْهٍ﴾

دنياپرست نفسمه ده ديديرتدى.

سعيد النورسى

٭ ٭ ٭

﴿بِاسْمِهِ سُبْحَانَهُ﴾

عزيز، صدّيق قارداشلرم!

أوّلا: سكسان سنه عبادتلى بر عمرى بختيارلره قزانديران رمضانِ مباركده إن شاء اللّٰه نورڭ شركتِ معنويسى او قزانجه مظهر اولاجق. بايرامه قدر ألدن گلديگى قدر نورجيلر إخلاص ايله بربرينڭ دعالرينه معنوى آمين ديمه‌لى كه، بريسى او سكسانى قزانسه هر برى درجه‌سنه گوره حصّه‌دار اولور. أڭ ضعيف و أڭ آغير يوكى بولونان بو خسته قارداشڭزه ألبته معنوى يارديم ايدرسڭز.