أى نورجيلر! شيمدى مادّى إمكان حاصل اولمايور دييه اوزولمه‌يڭز. نورڭ فتوحاتى گنيش بر ساحه‌ده دوام ايدييور. كلّى بر موفّقيت حاصل اولويور.

﴿هٰذَا مِنْ فَضْلِ رَبِّى﴾

٭ ٭ ٭

﴿بِاسْمِهِ سُبْحَانَهُ﴾

عزيز، صدّيق قارداشلرم!

بر قاچ آيدن بَرى عليهمه چوريلن دسيسه‌لرى ميدانه چيقدى. حفظِ إلٰهى ايله او مصيبت، يگرميدن بره ايندى.

خالى زمانده جامعه گيدييوردم. خبرم اولمادن، طلبه‌لر بنى اوشوتمه‌مك ايچون، محفلده بر قولبه‌جك ياپمشديلر. بن ده درت بش گوندر كندى كنديمه قرار ويردم، داها گيتميه‌جگم. او معلوم ضابط آدم واسطه اولوب قولبه‌جگى قالديرديلر. بڭا ده رسمًا تبليغ ايتديلر كه: "داها جامعه گيتميه‌جكسڭ." فقط حبّه‌يى قبّه ياپوب بر هيجان ويرديلر. هيچ بر أهمّيتى يوق، هيچ ده مراق ايتمه‌يڭز. تخمينمجه، هر طرفده حدّمدن پك فضله توجّهِ عامّه‌يى قيرمق ايچون، بڭا بويله بعض بهانه‌لرله إهانت ايدييورلر. أسكى زمانمى دوشونوب گويا تحمّل ايتميه‌جگم. حالبوكه (رسالهِٔ نورڭ سلامت و إنتشارينه خلل گلمه‌مك شرطيله) هر گون بيڭ إهانت و تعذيبلر ده گلسه، اللّٰهه شكر ايدرم. بن أهمّيت ويرمديگم گبى، بوراده‌كى طلبه‌لر ده هيچ صارصيلمييورلر. چوقدن بَرى بكله‌ديگمز بو حادثه ده، عنايتِ إلٰهيه ايله خفيف گچدى.

عموم قارداشلريمه برر برر سلام و دعا ايدييورز.

سعيد النورسى

٭ ٭ ٭